Pa danych Reuters, pryvatny samalot z Maskam pryziamliŭsia ŭ Piekinie 28 krasavika. Ab płanach biznesmiena naviedać Kitaj publična nie abjaŭlałasia. Vizit Maska supadaje z aŭtasałonam u Piekinie, jaki praciahniecca da 4 maja, ale ŭ Tesla niama stenda na aŭtašou.
Pavodle krynic Reuters, Mask maje namier sustrecca z kitajskimi čynoŭnikami, kab abmierkavać razhortvańnie prahramnaha zabieśpiačeńnia dla całkam aŭtanomnych aŭtamabilaŭ (FSD) u Kitai. Jon taksama choča atrymać dazvoł na pieradaču za miažu danych, jakija źbirajucca ŭ Kitai.
Pa słovach halinovych ekśpiertaŭ, składanyja ŭmovy darožnaha ruchu ŭ Kitai ź vialikaj kolkaściu piešachodaŭ i viełasipiedystaŭ zabiaśpiečvajuć bolš scenaryjaŭ dla navučańnia ałharytmaŭ aŭtanomnaha vadžeńnia bolš chutkimi tempami.
FSD — samaja sučasnaja viersija prahramnaha zabieśpiačeńnia dla aŭtapiłota ŭ mašynach Tesla. Kampanija jašče nie zrabiła jaje dastupnaj u Kitai, niahledziačy na zakliki klijentaŭ. Raniej Mask zajaviŭ, što Tesla moža razharnuć FSD u Kitai «vielmi chutka».
Tesla pradała ŭ Kitai bolš za 1,7 młn aŭtamabilaŭ z taho času, jak vyjšła na rynak u hetaj krainie dziesiać hadoŭ tamu. Z 2021 hoda kampanija zachoŭvaje ŭsie danyja, sabranyja jaje aŭtamabilami, u Šanchai, jak taho patrabujuć kitajskija orhany, i nie pieradaje ich u ZŠA. U Šanchai taksama raźmieščany zavod Tesla.
Ciapier čytajuć
U Sule adznačyli Kupalle. Haściej było stolki, što na darohach utvarylisia zatory6
Kamientary