Chalezin pra 2020: «Pieramovy pra harantyi biaśpieki Łukašenku išli, ale jon navat nie padniaŭ trubku, kali pazvaniła Mierkiel»
U vialikaj razmovie z «Našaj Nivaj» Mikałaj Chalezin raskazaŭ, što ŭ 2020-m krainy Azii i Łacinskaj Amieryki byli hatovyja pryniać Łukašenku ŭ vypadku jaho sychodu z pasady.
«Naša Niva»: Vy niadaŭna raskazvali, jak u 2020-m sprabavali vieści pieramovy z Łukašenkam. «My prapanoŭvali varyjant adlotu. Byŭ čałaviek, jaki hatovy byŭ harantavać jamu biaśpieku. Navat jaho dzieci byli za heta». Možacie raskazać bolš?
Mikałaj Chalezin: Heta nie zusim tak vyhladała. My ŭ pramym kantakcie nie byli, i nie było ŭ hetym nieabchodnaści. Heta nie tyčyłasia apazicyjnych struktur — chutčej, kamunikavali z našymi zamiežnymi partniorami. I tady była takaja ideja. Biaśpieku harantavała b kraina, jakaja prymaje.
Pieramovy šli, ale naš klijent byŭ u takim isteryčnym stanie, što navat nie padniaŭ trubku, kali pazvaniła Anhieła Mierkiel, jakaja pavinna była vieści pieramovy. Paśla nam patłumačyli, što jon z žančynaj i nie moh vieści pieramovy, nie ŭ jaho charaktary, nie ŭ jaho psichičnym stanie. Adziny, chto moh by być — chtości z kiraŭnikoŭ dziaržaŭ, chto ŭ svoj čas raźviazvaŭ vajnu ci vioŭ bajavyja dziejańni. Moh być, napeŭna, Džordž Buš-małodšy, brytanski premjer Toni Błer (i jon byŭ hatovy da pieramoŭ).
Usio heta było pa-za sistemaj pramoha kantaktu z Łukašenkam, tamu što jon na hety kantakt tak i nie pajšoŭ.
«NN»: To-bok byŭ kantakt ź jaho atačeńniem?
MCH: Tak, heta byli sihnały, jakija pasyłalisia. Kali tabie telefanuje kiraŭnica Hiermanii, to ty pavinien razumieć, pra što budzie razmova, asabliva na piku kanfrantacyi. I jaho dzieci jašče da vybaraŭ kazali — heta ŭžo ź inšych krynic historyja, — što, moža być, treba niešta prydumać, kab zachavać svaje aktyvy. Jon na heta nie pajšoŭ, uvajšoŭšy ŭ takoje psichałahičnaje pikie, ź jakoha nie vybraŭsia.
«NN»: Hety płan prapanoŭvali zachodnija palityki?
MCH: Skažam tak, na toj momant nijakaha apazicyjnaha błoku nie isnavała. Isnavali štaby, hetyja štaby nie mieli mižnarodnaj padtrymki, bo jany nie raźvivali mižnarodny kirunak. Tamu daviałosia ŭziać hetuju adkaznaść hrupie, jakaja aktyŭna pracavała na praciahu mnohich hadoŭ z zachodnimi palitykami.
«NN»: A jakija krainy ŭ hetym płanie byli b hatovyja jaho pryniać? Emiraty?
MCH: Tak, jość ceły šerah krain, jakija mohuć heta rabić. U asnoŭnym heta tyčycca Azii i Łacinskaj Amieryki.
Čytajcie taksama:
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj46
Kamientary