Polšča i Litva vystupajuć za sinchranizacyju sankcyj adnosna Biełarusi i Rasii
Pra nieabchodnaść sinchranizavać sankcyi, uviedzienyja suprać pucinskaj Rasii i łukašenkaŭskaj Biełarusi, zajavili kiraŭniki MZS Polščy i Litvy Radasłaŭ Sikorski i Habryelus Łandśbierhis padčas sustrečy ŭ Varšavie.
Habryelus Łanśbierhis i Radasłaŭ Sikorski. Fota MZS Litvy
«Uraŭnoŭvańnie mieła b jak praktyčny, tak i jurydyčny sens, bo Biełaruś taksama źjaŭlajecca dziaržavaj-ahresaram, pakolki dała svaju terytoryju dla napadu na Kijeŭ. Kab sankcyi dali efiekt, ich nieabchodna efiektyŭna ŭžyvać, i hetaj mety pasłužyć ich sinchranizacyja», — zajaviŭ Sikorski.
Łandśbierhis dadaŭ, što z pačatku vajny ekspart niekatorych tavaraŭ ź Biełarusi ŭ ES vyras u 30 razoŭ — i heta nie biełaruskija tavary, a rasijanie vykarystoŭvajuć padparadkavanuju sabie krainu dla abychodu abmiežavańniaŭ.
«Dla nas vidavočna, što Biełaruś vykarystoŭvajecca Rasijaj dla ekspartu tavaraŭ, jakija padpadajuć pad sankcyi. Pa hetaj pryčynie pavinna adbycca ich vyraŭnoŭvańnie», — rastłumačyŭ svaju pazicyju Łandśbierhis.
Akramia taho, krainy Jeŭrasajuza, jakija miažujuć z Rasijaj i Biełaruśsiu, pavinny ŭžyvać adziny miechanizm kantrolu sankcyjnaha režymu, dadaŭ Habryelus Łandśbierhis.
«Krainy z ahulnaj miažoj z Rasijaj i Biełaruśsiu pavinny prytrymlivacca adzinaha miechanizmu prymianieńnia sankcyj i prykładać ahulnyja namahańni da pierakryćcia šlachoŭ ich abychodu», — pryvodzić jahonyja słovy pres-słužba litoŭskaha źniešniepalityčnaha viedamstva.
Čytajcie taksama:
Kiraŭnik MZS Łatvii zaklikaŭ sinchranizavać sankcyi suprać Rasii i Biełarusi
Ciapier čytajuć
Na Alaksandru Hierasimieniu napali ŭ centry Varšavy18
Kamientary