Supracoŭnika viciebskaha abłvykankama sudziać za «ahienturnuju dziejnaść» na karyść Ukrainy
U Viciebskim abłasnym sudzie 15 lutaha raspačaŭsia sud nad 37-hadovym hramadzianinam Ukrainy Andrejem Šmajem.
Jaho abvinavačvajuć pa dvuch ciažkich artykułach Kryminalnaha kodeksa: art. 358 (špijanaž) i art. 358-1 (ahienturnaja dziejnaść), pa jakich ukraincu pahražaje da 15 hadoŭ źniavoleńnia. Spravu razhladaje Jaŭhien Burunaŭ. Praces prachodzić u zakrytym režymie, piša «Viasna».
Andrej utrymlivajecca pad vartaj z 19 studzienia 2023 hoda ŭ SIZA-2. Zatrymali jaho naŭprost na pracoŭnym miescy. Doŭhi čas siamja nie viedała, što ź im zdaryłasia, i tolki praz dva tydni žoncy Andreja patelefanavali z orhanaŭ. Čałaviek, jaki nazvaŭsia śledčym, paprasiŭ pieradać dakumienty Andreja. Bolš nijakich padrabiaznaściaŭ jon nie paviedamiŭ.
Mužčyna naradziŭsia ŭ Čarnihavie i maje ŭkrainskaje hramadzianstva. U Biełaruś jon pierajechaŭ paśla žanićby. Siamja ŭžo 10 hadoŭ žyła ŭ Viciebsku. Pracavaŭ Andrej rabočym pa absłuhoŭvańni budynkaŭ Viciebskaha abłvykankama.
U filmie ANT pra terakt u Mačuliščach i sietku SBU, jaki vyjšaŭ 5 krasavika 2023 hoda, u Biełarusi havorycca, nibyta Andrej Šmaj rehularna adpraŭlaŭ infarmacyju pra situacyju ŭ abłvykankamie praz mesendžar Signal va Ukrainu svajmu małodšamu bratu Rusłanu, jaki słužyć u Čarnihaŭskim apieratyŭnym upraŭleńni «Poŭnač» i źjaŭlajecca namieśnikam kamandzira ŭ apieratyŭnych spravach. U filmie taksama śćviardžajecca, što pierapiska była zašyfravanaj, chacia Andrej Šmaj tłumačyć, što prosta vydalaŭ paviedamleńni, kali ich źbirałasia šmat.
Viadoma, što Andrej Šmaj — były vajskoviec, z 2006 pa 2013 h. słužyŭ na biełaruska-ŭkrainskaj miažy inśpiektaram punkta propusku «Jaryłavičy». Potym pierajechaŭ u Viciebsk, uładkavaŭsia rabočym pa kompleksnym absłuhoŭvańni i ramoncie budynkaŭ i zbudavańniaŭ — vykonvaŭ roznyja raboty, źviazanyja z padtrymańniem materyjalnaj častki ŭstanovy (absłuhoŭvańnie elektryki, santechniki i inšyja biahučyja raboty, jakija nie patrabujuć vysokaj kvalifikacyi).
Ciapier čytajuć
Trahiedyja ŭ Barysaŭskaj balnicy: unučka pacyjenta kaža, što na jaho źviarnuli ŭvahu praz šeść hadzin, kali ŭžo piena pajšła z rota — jon pamior16
Kamientary