Izrail pačaŭ maštabnuju apieracyju ŭ Rafachu. U horadzie chavajucca paŭtara miljona čałaviek
Vyzvalili dvuch zakładnikaŭ.
Armija abarony Izraila (CACHAŁ) nanosić intensiŭnyja avijaŭdary pa horadzie Rafach, u jakim chavajucca, jak śćviardžajuć ułady Hazy, kala paŭtara miljona čałaviek, jakija pakinuli paŭnočnyja rajony siektara paśla pačatku vajennaj apieracyi izrailskich vojskaŭ — bolš za pałovu ŭsiaho nasielnictva ankłava, piša Bi-bi-si.
CACHAŁ taksama paviedamiŭ ab vyzvaleńni dvuch zakładnikaŭ, zachoplenych CHAMAS 7 kastryčnika. Pres-ataše CACHAŁ paviedamiŭ, što zakładniki znachodziacca ŭ «dobrym» stanie i adpraŭlenyja ŭ balnicu na miedahlad.
Izrail zajaviŭ, što nanios udary pa paŭdniovaj častcy siektara Haza, a Ministerstva achovy zdaroŭja, padkantrolnaje CHAMAS, paviedamiła pra jak minimum 67 zahinułych.
Vidavočcy ŭ horadzie raspaviali pra načnyja avijaŭdary pa poŭnačy i centry Rafacha. Viertaloty i katary taksama byli zadziejničanyja ŭ atacy, raspaviali žychary.
U zajavie, apublikavanaj u sacyjalnych sietkach, Armija abarony Izraila paviedamiła, što ŭ chodzie načnoj sumiesnaj apieracyi CACHAŁ, Ahienctva biaśpieki Izraila Šyn-Bet i palicyi Izraila byli vyratavany dva izrailskija zakładniki z kibuca Nir-Icchak: Fiernanda Simon Marman (60 hadoŭ) i Łuis Char (70 hadoŭ).
Vyratavanyja zakładniki byli dastaŭlenyja ŭ miedycynski centr «Šyba» ŭ centry Izraila dla abśledavańnia.
Sa słoŭ pradstaŭnika CACHAŁ kontradmirała Daniela Chahary, zakładnikaŭ vyjavili na druhim paviersie ŭ adnym z budynkaŭ u Rafachu.
Chahary paviedamiŭ, što izrailskija vojski viali «intensiŭnyja pierastrełki adnačasova ŭ niekalkich miescach z mnohimi terarystami».
U niadzielu Ministerstva achovy zdaroŭja Hazy, kiravanaje CHAMAS, śćviardžaje, što za minuły dzień izrailskija vajskoŭcy zabili jašče 112 paleścincaŭ, u vyniku čaho ahulnaja kolkaść zahinułych pieravysiła 28 100 čałaviek, a paranienych — bolš za 67 500.
Mahčymaje nastupleńnie na Rafach abmiarkoŭvałasia ŭžo niekalki dzion. Šerah krain i mižnarodnych arhanizacyj vykazali zaniepakojenaść z nahody vajennych dziejańniaŭ u pieranasielenym horadzie — pradstaŭnik AAN pa humanitarnych pytańniach zajaviŭ, što ciapier im niama kudy biehčy.
Da taho ž praz KPP «Rafach», raźmieščany ŭ horadzie, u Hazie dastaŭlajuć humanitarnuju dapamohu. Na siońnia heta adziny dziejučy maršrut dla dastaŭki ŭ Hazie takoj nieabchodnaj ježy, vady i miedykamientaŭ.
U niadzielu prezident ZŠA Džo Bajden zajaviŭ premjer-ministru Izraila Bińjaminu Nietańjachu, što nastup na Rafach nie pavinien adbyvacca bieź mier pa harantavańni biaśpieki cyvilnaha nasielnictva.
Pa słovach Bajdena, Izrailu nieabchodny «nadziejny i vykanalny płan» pa abaronie žycharoŭ horada.
Pradstaŭniki CHAMAS zajavili, što achviarami nastupu na horad mohuć stać dziasiatki tysiač čałaviek, i što lubaja apieracyja ŭ Rafachie niehatyŭna adabjecca na chodzie pieramovaŭ ab vyzvaleńni izrailskich zakładnikaŭ, jakija ŭsio jašče zastajucca ŭ rukach bajevikoŭ.
«Minułaj nočču Izrail pravioŭ vajennuju apieracyju, — skazała ŭ intervju Bi-bi-si Hada Al-Kurd, maci dvaich dziaciej. — Jany zabili šmat paleścincaŭ, a my ŭ hety čas spali ŭ svaich damach, ale heta znak dla nas jak maha chutčej pakinuć Rafach, bo ŭ inšych haradach — Chan-Junis i Hazie — usio adbyvałasia pa tym ža scenary».
Hada raspaviała, što čakaje abjavy płana evakuacyi: «zvyčajna jany raskidvajuć ulotki i publikujuć u sacyjalnych sietkach infarmacyju pra toje, kudy treba evakujavacca. Tak što my čakajem».
Kamientary