Eks-pres-sakratar MUS ździviła adkazam na pytańnie, ci varta błakavać sacsietki ŭ Biełarusi
Ci treba ŭ Biełarusi błakavać pracu videachostynhu YouTube, sacsietki Instagram abo inšych placovak, jakimi aktyŭna karystajucca žychary krainy, raspaviała ŭ efiry ANT byłaja pres-sakratarka MUS, a ciapier načalnica hałoŭnaha ŭpraŭleńnia ideałahičnaj pracy i ŭ spravach moładzi Minharvykankama Volha Čamadanava, zaŭvažyła «Lusterka».
— Usio, što my siońnia z vami zabaronim, abmiažujem i hetak dalej … paviercie vy mnie, u nastupnym my budziem vyrašać bolš hłabalnyja prablemy. My prosta stvorym ich jašče bolš, — skazała Čamadanava.
Na dumku eks-pres-sakratara MUS, ludzi, jakija karystajucca hetymi resursami, «usio roŭna pryjduć da taho, da čaho vielmi imknulisia».
— Samaje składanaje zaŭsiody było — heta zajmacca prafiłaktykaj. < … > Znajści miechanizmy i sposaby, jakija b idealna siońnia padychodzili dla ŭsich, — tak, voś heta ciažka… — skazała Čamadanava, padkreśliŭšy, što kali nie iści pa šlachu błakavańniaŭ i abmiežavańniaŭ, to biełaruskija ŭłady, naadvarot, ad hetaha vyjhrajuć.
Ministerstva infarmacyi rehularna błakuje sajty biełaruskich i zamiežnych niezaležnych ŚMI. Materyjały bolšaści niezaležnych ajčynnych miedyjaresursaŭ pryznanyja «ekstremisckimi», za ich raspaŭsiud u sacsietkach biełarusaŭ štrafujuć i adpraŭlajuć na sutki.
Akramia taho, z 2021 hoda MUS papaŭniaje śpis «ekstremisckich» farmavańniaŭ. Pieršym tudy trapiła abjadnańnie rabočych «Rabočy ruch». Usiaho ŭ śpis na momant publikacyi ŭniesiena 171 «farmavańnie»: siarod ich mnostva telehram-kanałaŭ i čataŭ — rajonaŭ i haradoŭ, zavodaŭ, dyjaspar, bolšaść niezaležnych ŚMI i navat muzyčny hurt z Rahačova Tor Band.
Pavodle źviestak Biełaruskaj asacyjacyi žurnalistaŭ, na 1 lutaha 2024 hoda 35 supracoŭnikaŭ ŚMI ŭ Biełarusi znachodziacca ŭ niavoli. Pa vynikach minułaha hoda naša kraina ŭvajšła ŭ top-3 pa kolkaści žurnalistaŭ u źniavoleńni.
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary