U Ispanii ŭpieršyniu ŭ rehijanalny parłamient abrali žančynu ź sindromam Daŭna
Na praciahu dziesiacihodździaŭ 45-hadovaja Mar Halseran zmahałasia za toje, kab ludzi ź intelektualnaj niedastatkovaściu byli častkaj farmavańnia paradku dnia krainy. Adnak stupień prahresu, dasiahnutaha joju, stała vidavočnaj tolki niadaŭna, kali Mar Halseran stała pieršym deputatam u Ispanii, jakomu dyjahnastavany sindrom Daŭna, piša Guardian.
«Hramadstva pačynaje bačyć, što ludzi ź sindromam Daŭna mohuć unieści vialiki ŭkład. Ale heta vielmi doŭhi šlach», — ličyć žančyna.
Jaje dasiahnieńnie rychtavałasia ciaham dziesiacihodździaŭ. Kali Halseran było 18 hadoŭ, jana ŭstupiła ŭ kansiervatyŭnuju Narodnuju partyju. Patrochu jana prasoŭvałasia ŭ partyjnym aparacie, a ŭ traŭni minułaha hoda była ŭklučanaja pad 20-m numaram u śpis kandydataŭ, jakich partyja vystaŭlała na rehijanalnych vybarach u Valensii.
Nieŭzabavie stała viadoma, što Halseran atrymała miesca ŭ rehijanalnym parłamiencie. Heta dasiahnieńnie vyvodzić jaje ŭ šerahi zusim niešmatlikich ludziej ź sindromam Daŭna, jakija pieraadoleli barjery, kab uvajści ŭ śviet palityki. U 2020 hodzie Eleanora Łału stała členam haradskoj rady Arasa na poŭnačy Francyi, a irłandziec Fintan Brej taksama byŭ abrany deputatam haradskoj rady ŭ 2022 hodzie.
U Ispanii Anchieła Bačyler jašče ŭ 2013 hodzie stała pieršym u Ispanii deputatam haradskoj rady ź sindromam Daŭna ŭ paŭnočnym horadzie Valjadalid.
Adnak Halseran moža być pieršaj u Jeŭropie, chto ŭvajšoŭ u rehijanalny abo nacyjanalny parłamient, paviedamlaje Ispanskaja fiederacyja ludziej ź sindromam Daŭna. «My nie čuli ni pra kaho inšaha», — skazaŭ jaje pradstaŭnik.
Pierad hetym bolš za 20 hadoŭ Halseran pracavała na dziaržaŭnaj słužbie ŭ Valensii, apošnim časam dapamahajučy ŭ vypracoŭcy inkluziŭnaj palityki. Akramia taho, čatyry hady jana praviała na čale valensijskaj arhanizacyi Asindown, jakaja zajmajecca dapamohaj siemjam ź dziećmi ź sindromam Daŭna.
Kali pryniasieńnie Halseran parłamienckaj prysiahi było pryvitanaja ispanskimi ŚMI, to reakcyja ŭ internecie, pa jaje słovach, była nieadnaznačnaj.
«U sacyjalnych sietkach možna znajści ŭsialakaje», — skazała jana. «Jość ludzi, jakija mianie padtrymlivajuć. Ale jość i inšyja, jakija dumajuć, što ja niazdatnaja. Ale heta ludzi, jakija nie viedajuć ni mianie, ni majho pachodžańnia».
Jana spadziajecca, što svajoj prysutnaściu ŭ rehijanalnym parłamiencie dapamoža razburyć šmatlikija zababony, jakija praciahvajuć zastavacca ŭ hramadstvie, asabliva kali havorka idzie pra ludziej ź sindromam Daŭna. «Ja chaču, kab ludzi bačyli mianie jak asobu, a nie tolki praz pryzmu majoj invalidnaści».
Kamientary