Polšča pieraškadžała rasśledavańniu spravy ab padryvie trubapravoda «Paŭnočny patok» — WSJ

Pa ich słovach, polskija čynoŭniki marudzili z nadańniem infarmacyi i ŭtojvali klučavyja dokazy ab pierasoŭvańniach mierkavanych dyviersantaŭ pa polskaj terytoryi. Ciapier ža, kali ŭ Polščy byŭ stvorany novy ŭrad, jeŭrapiejskija śledčyja spadziajucca, što jon pojdzie na bolš adkrytaje supracoŭnictva ŭ hetaj spravie.

Padryŭ trubapravoda stała najbujniejšym takim incydentam u Jeŭropie z časoŭ Druhoj suśvietnaj vajny. U vyniku hetaha incydentu Hiermanija i inšyja krainy vymušanyja byli šukać inšyja krynicy pryrodnaha hazu zamiest rasiejskaha. 

Jeŭrapiejskija śledčyja doŭhi čas ličyli, što napad byŭ ździejśnieny ludźmi, jakija pracavali ŭ intaresach Ukrainy z vykarystańniem terytoryi Polščy. 

Ale choć da hetaj viersii i schilajucca, dokazaŭ hetaha niama. Rasija ŭvohule pa staroj dobraj tradycyi abvinavaciła va ŭsim ZŠA, a Vašynhton kateharyčna abvierh hetyja abvinavačvańni. 

Rasśledavańnie, praviedzienaje Hiermanijaj, Danijaj i Šviecyjaj, pakazała, što trubapravod byŭ uzarvany ź jachty «Andramieda», ekipaž jakoj składaŭsia z šaści čałaviek (piać mužčyn i adna žančyna), u liku jakich byli vadałazy-hłybakavodniki. Pa dadzienych śledstva, «Andramieda» spyniałasia ŭ troch vyšejpieraličanych krainach, a taksama ŭ Polščy. Jachtu arandavali ŭ Hiermanii praz polskuju kampaniju, i na joj vyjavili ślady aktahienu — toj samaj vybuchoŭki, jakuju znajšli i na miescach padvodnaha vybuchu. Pa viersii śledstva, paśla minavańnia trubapravoda ekipaž pryšvartavaŭsia ŭ polskim porcie Kałobžah, tam jany praviali ceły dzień. 19 vieraśnia polskaja pamiežnaja słužba pravieryła pašparty ekipaža, va ŭsich na jachcie byli pašparty Jeŭrasajuza. Paśla hetaha «Andramieda» adpłyła na poŭnač, dzie, mahčyma, vadałazy zakłali astatnija miny.

Admova Varšavy paŭnavartasna supracoŭničać uskładniła vyśviatleńnie taho, ci napad byŭ ździejśnieny ź viedama abo bieź viedama byłoha polskaha ŭrada.

Polskija ŭłady nie dzialilisia hetaj infarmacyjaj ź jeŭrapiejskimi śledčymi ažno da sakavika 2023 hoda — i zrabili heta tolki paśla taho, jak ź imi źviazalisia ich niamieckija kalehi. Bierlin atrymaŭ infarmacyju pra znachodžańnie jachty ŭ Polščy ad niderłandskaj vajskovaj raźviedki ŭ studzieni, a tyja, u svaju čarhu, ad infarmataraŭ z Ukrainy.

Jašče šerah polskich śpiecsłužbaŭ admovilisia padzialicca ź jeŭrapiejskimi śledčymi zapisami padazravanych z kamieraŭ videanazirańnia ŭ porcie. Adzin raz polskaja prakuratura paviedamiła svaim jeŭrapiejskim kaleham, što na «Andramiedzie» nie znojdziena vybuchovych rečyvaŭ, choć sudova-miedycynskaja ekśpiertyza na toj momant jašče navat nie pravodziłasia. Polskaja prakuratura taksama spačatku zajaviła, što «Andramieda» prybyła ŭ port Kałobžaha kala 16:00 19 vieraśnia i praviała tam 12 hadzin. Ale paźniej śledčyja vyśvietlili, što nasamreč jachta pryšvartavałasia ŭ polskim porcie a 9-aj hadzinie ranicy paśla načnoha padarožža z Danii. 

Tonkaść situacyi ŭ tym, što Polšča kraina NATA, a padryŭ hazapravoda byŭ skiravany suprać inšych krain NATA. U svaju čarhu, Maskva moža razhladać pavodziny Polščy jak ahresiŭny akt z boku NATA.

U vieraśni 2023 hoda Stanisłaŭ Žaryn, ministr-kaardynatar polskich śpiecsłužbaŭ, advierh vysnovy ab tym, što za dyviersijaj stajaŭ ekipaž «Andramiedy». Žaryn zajaviŭ, što heta byli prosta turysty, jakija «adpačyvali».

Adnak nieŭzabavie paśla taho Słužba ŭnutranaj biaśpieki Polščy razam ź jeŭrapiejskimi śledčymi raspaŭsiudzili infarmacyju ab tym, što na «Andramiedzie», chutčej za ŭsio, pracavali rasijskija špijony. U niadaŭnim intervju Žaryn, jaki ŭžo straciŭ pasadu ŭ vyniku źmieny ŭrada, skazaŭ, što za padryvam trubapravoda, praŭdapadobna, stajała Rasija.

Zastajecca tolki hadać, ci budzie mieć upłyŭ na chutkaść rasśledavańnia źmiena ŭrada ŭ Polščy. 

• 9
• 0
• 1
• 3
• 3
• 3
• 2
• 0