Praz usie sistemy biaśpieki. U ZŠA prylacieŭ rasijanin zusim biez dakumientaŭ. Nichto nie razumieje, jak jon heta zrabiŭ

«Rasijski ekanamist» prylacieŭ u Łos-Andželes biez patrebnych dla ŭjezdu ŭ ZŠA pašparta i vizy ŭ listapadzie, havorycca ŭ sudovym dakumiencie, jaki apublikavała vydańnie 404.

Z dakumienta vynikała, što mužčyna nie pamiataŭ, jak apynuŭsia ŭ samalocie. Pry sabie ŭ jaho byli niekalki paśviedčańniaŭ asoby Rasii i Izraila na imia Siarhieja Uładzimiraviča Ačyhavy. Va ŭciečkach rasijskich baz źviestak, jakija vyvučyła «Ahientstvo», jość tolki adzin čałaviek z takim proźviščam, imieniem, i jon sapraŭdy byŭ ekanamistam.

Spačatku mužčyna na pamiežnym kantroli skazaŭ, što straciŭ pašpart u samalocie, adnak znajści jaho tam nie ŭdałosia. A nastupnaja pravierka avijakampanii pakazała, što mužčyna nie rehistravaŭsia na rejs, i zusim niezrazumieła, jak jon trapiŭ u samalot.

U jaho sumcy znajšli rasijski ŭnutrany pašpart, a taksama izrailski dakumient, jaki nie daje prava na biaźvizavy ŭjezd u ZŠA (izrailcianie zamiest atrymańnia vizy pavinny prachodzić papiaredniuju elektronnuju pravierku ESTA, ale Ačyhava zajaŭki ŭ hetuju sistemu nie padavaŭ).

Členy ekipaža raspaviali, što na borcie mužčyna pierasadžvaŭsia ź miesca na miesca, kamunikavaŭ z pasažyrami i sprabavaŭ zjeści šakaład, jaki pryznačaŭsia členam ekipaža. Kožny raz, kali prapanoŭvali ježu, jon prasiŭ padvojnuju porcyju.

Supracoŭnikam FBR mužčyna pradstaviŭsia rasijskim ekanamistam, i skazaŭ, što nie razumieje, dzie znachodzicca.

Jon paviedamiŭ, što nie spaŭ try dni, i što ŭ jaho, mahčyma, byŭ kvitok na rejs u ZŠA, ale jon nie ŭpeŭnieny.

Jon skazaŭ, što nie pamiataje, jak sieŭ na samalot, a taksama nie zmoh rastłumačyć, jak trapiŭ u Kapienhahien i što tam rabiŭ. Na jahonym telefonie supracoŭniki FBR znajšli fatahrafiju tabło aeraporta Kapienhahiena, a taksama skrynšoty prykładańnia «Karty» z chostełami ŭ niamieckim horadzie Kil i z kartaj «nieviadomaha zamiežnaha horada», havorycca ŭ dakumiencie suda.

Jak daviedałasia «Ahienctva», u rasijskich uciečkach jość tolki adzin Siarhiej Uładzimiravič Ačyhava. Ź jaho reziume vynikaje, što ŭ 2003 hodzie jon atrymaŭ stupień kandydata ekanamičnych navuk, aśpiranturu jon prachodziŭ u Rasijskaj ekanamičnaj akademii imia Plachanava (REU), byŭ kansultantam u kampanii «Markietynhavyja i inviestycyjnyja prajekty» i zajmaŭ takuju ž pasadu ŭ kansałtynhavaj kampanii «Intielektsiervis». Taksama jon vykładaŭ u REU imia Plachanava. 

Ačyhava byŭ saŭładalnikam troch kampanij, kožnaja ź jakich užo spyniła dziejnaść, piša «Ahientstvo». U 1998 hodzie mužčyna byŭ sudzimy za nabyćcio abo zachoŭvańnie hašyšu.

Telehram-akaŭnt, da jakoha pryviazany numar Ačyhavy, apošni raz byŭ u siecivie 3 lipienia.

• 3
• 0
• 35
• 11
• 27
• 1
• 8
• 0