«Čakajem jasnaj kamunikacyi, što Biełaruś nie addaduć jak suciašalny pryz dla Pucina». U Vašynhtonie prachodzić stratehičny dyjałoh demakratyčnych sił Biełarusi z ZŠA
Śviatłana Cichanoŭskaja hetymi dniami znachodzicca ź vizitam u ZŠA dla ŭdziełu ŭ stratehičnym dyjałohu demakratyčnych sił Biełarusi z ZŠA, jaki prachodzić 6-7 śniežnia. U jaho ramkach abmiarkoŭvajucca pytańni abarony suvierenitetu, stabilnaści i demakratyi ŭ krainie, padtrymki palitviaźniaŭ i niezaležnych ŚMI, a taksama miery pa pryciahnieńni biełaruskaha režymu da adkaznaści.
«Stratehičny dyjałoh vyvodzić našaje partniorstva z ZŠA na novy ŭzrovień. My čakajem, što ŭ vyniku hetaj sustrečy źjavicca jasnaja stratehija i darožnaja karta, a taksama kankretnyja prajekty, jakija dapamohuć viarnuć Biełaruś da demakratyi, vyzvalić palitviaźniaŭ, zachavać niezaležnaść Biełarusi
My čakajem ad ZŠA jasnaj kamunikacyi, što Biełaruś nie addaduć jak suciašalny pryz dla Pucina, što Biełaruś zmoža raźličvać na padtrymku dla adnaŭleńnia ekanomiki, što Biełaruś zmoža atrymać jeŭrapiejskuju pierśpiektyvu», — adznačyła Cichanoŭskaja pierad pačatkam mierapryjemstva.
«Ja spadziajusia, što ŭ vyniku stratehičnaha dyjałohu ZŠA pryznačać śpiecyjalnaha pradstaŭnika dla Biełarusi, budzie abnoŭleny Akt ab demakratyi ŭ Biełarusi, my pačniem aktyŭnaje supracoŭnictva z technałahičnymi kampanijami, buduć zakrytyja ščyliny ŭ sankcyjach i režym Łukašenki budzie pryciahnuty da adkaznaści», — vykazała jana pažadańni ad stratehičnaha dyjałohu.
U ramkach stratehičnaha dyjałohu prajšli try panelnyja dyskusii: «Suvierennaja, stabilnaja, demakratyčnaja Biełaruś», «Pravy čałavieka i palityčnyja źniavolenyja», «Miechanizmy padspravazdačnaści».
Adkryvała mierapryjemstva namieśnica kiraŭnika Dziarždepartamienta ZŠA Viktoryja Nułand. U jakaści śpikieraŭ z boku ŭrada ZŠA ŭ hetych mierapryjemstvach udzielničali siarod inšych vysokapastaŭlenyja čynoŭniki ź Dziarždepartamienta ZŠA i Ahienctva ZŠA pa mižnarodnym raźvićci.
Taksama ŭ ambasadzie Kanady ŭ Vašynhtonie adbyłasia dyskusija z udziełam Śviatłany Cichanoŭskaj i Łary Dajmanda, viadomaha amierykanskaha palitołaha i śpiecyjalista ŭ pytańniach vyvučeńnia demakratyi. Udzieł u joj brali palityki, ekśpierty i čynoŭniki ZŠA, usiaho bolš za 200 čałaviek.
Padčas hetaj dyskusii Cichanoŭskaja raskazała pra pryčyny zachavańnia dyktatury ŭ Biełarusi, padziei 2020 hoda, a taksama pra zachady, jakija mižnarodnaja supolnaść moža zrabić, kab padtrymać biełarusaŭ.
Akramia hetaha, u Vašynhtonie Śviatłana Cichanoŭskaja atrymała premiju imia Džordža Buša i Marharet Tetčer «Za svabodu», jakuju ŭručajuć za asablivy ŭniosak u prasoŭvańnie kaštoŭnaściaŭ demakratyi i pravoŭ čałavieka.
Taksama hetuju premiju prysudzili lidaram dźviuch biełaruskich palityčnych partyj — Ryhoru Kastusiovu (BNF) i Mikałaju Kazłovu (AHP), jakija zaraz znachodziacca ŭ źniavoleńni.
Śviatłana Cichanoŭskaja pryśviaciła atrymanuju premiju biełaruskim palitviaźniam.
Asnoŭnymi temami dyskusij druhoha dnia stratehičnaha dyjałohu majuć stać dapamoha pryvatnamu siektaru i biełaruskamu biznesu, a taksama padtrymka niezaležnych ŚMI dy baraćba z dezynfarmacyjaj.
Ciapier čytajuć
«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii33
Kamientary