Nielehały, što pierajšli miažu ź Biełaruśsiu, uryvajucca ŭ damy łatvijcaŭ
MUS Łatvii z-za rostu vypadkaŭ nielehalnaha pierachodu miažy abviaściła ŭ Kaŭnackaj vołaści Krasłaŭskaha kraju i horadzie Łudzie, a taksama jašče ŭ šaści vałaściach Łudzienskaha kraju režym asablivaha pamiežnaha kantrolu, bo biežancaŭ, jakija pierachodziać miažu niezakonna, zatrymlivajuć usio dalej ad łatvijskaj miažy, paviedamlaje lsm.lv.
Uviadzieńnie režymu asablivaha pamiežnaha kantrolu — heta adzin ź mietadaŭ baraćby ź nielehalnymi imihrantami, jakija niezakonna pierasiakajuć łatvijskuju miažu i z boku Rasii, i z boku Biełarusi. Apošnim časam asabliva šmat takich vypadkaŭ nazirałasia na łatvijska-biełaruskaj miažy, i pamiežniki zatrymlivali nielehałaŭ ŭsio dalej ad miažy.
Jak raspavioŭ miascovy žychar Janis Siakste, u dom jaho baćkoŭ dvojčy ŭryvalisia i niejki čas znachodzilisia nielehalnyja mihranty:
«Heta było 15 kastryčnika, kali ŭ niežyły dom maich baćkoŭ uvarvalisia nielehalnyja mihranty, jakija pierajšli miažu ź Biełaruśsiu. Jany byli z Samali. Naohuł z afrykanskich krain. Potym była jašče adna hrupa mihrantaŭ. Dom ad miažy znachodzicca na adlehłaści 30 kiłamietraŭ.
Ja tak razumieju, što jany dobra viedajuć kudy iści, dzie možna spynicca, jość infarmacyja pra toje, što dom niežyły. U pieršy dzień byli zatrymanyja dvoje nielehałaŭ, a na druhi dzień užo vosiem čałaviek — adna žančyna, adzin padletak, a astatnija mužčyny za tryccać», — skazaŭ mužčyna.
Janis kaža, što hości, jakija vyłomlivajuć dźviery, pakidajuć śmiećcie. U vioscy na pamiežžy jašče jość damy, dzie žyvuć adzinokija pažyłyja ludzi.
«Majomaść majomaściu, ale mnie zdajecca, što bolš treba chvalavacca za ludziej, jakija žyvuć bližej da miažy, na chutarach, adzinokich piensijanierach. Jak jany siabie adčuvajuć, viedajučy, što pobač chodziać čužyja, hałodnyja ludzi? Bo tyja, chto łamiŭsia ŭ moj dom, raspaviadali, što nie jeli try dni. I čaho možna čakać ad ich?», — zadaŭsia pytańniem Janis.
U asobnych pryhraničnych vałaściach Łudzienskaha kraju i da hetaha dziejničaŭ asablivy režym kantrolu, ale staršynia krajovaj dumy ličyć, što ŭviadzieńnie asablivaha kantrolu jašče i ŭ piaci pamiežnych vałaściach padtrymaje paradak i biaśpieku ŭ pryhraniččy.
Asablivy pahrankantrol užo dziejničaje na terytoryi Daŭhaŭpiłsa, a taksama ŭ častcy pamiežnych Daŭhaŭpiłskaha, Łudzienskaha, Krasłaŭskaha i Aŭhšdaŭhaŭskaha kraju.
«Pamiežniki majuć prava spyniać i praviarać transpartnyja srodki, dakumienty na ŭsioj terytoryi Łatvii. Jašče pry ŭzmocnienym režymie pracy sistemy achovy miažy, kali pamiežniki kanstatujuć nielehalnych mihrantaŭ na peŭnych terytoryjach, u ich jość prava viarnuć ich nazad na terytoryju Respubliki Biełaruś», — skazaŭ namieśnik načalnika Daŭhaŭpiłskaha ŭpraŭleńnia pamiežnaj achovy Rajmand Kublickis.
Sioleta nielehalna pierasiekli łatvijska-biełaruskuju miažu bolš za 13,5 tysiač čałaviek, a pa humanitarnych mierkavańniach u Łatviju puścili 416 čałaviek.
Ciapier čytajuć
«Ja pieršamajskaje bydła i limita, bazaru nul. Ale blizki da centra pryniaćcia rašeńniaŭ». Što Tur piša pad psieŭdanimam u «ekstremisckim» čacie19
Kamientary