Hety spartsmien samy chutki na lodzie. Ekśpierty bačać jaho budučyniu i ŭ viełasporcie
Amierykanski kańkabiežac Džordan Štolc, jaki staŭ adnym z hałoŭnych hierojaŭ zimovaj Alimpijady, tearetyčna moh by zrabić karjeru i ŭ prafiesijnym viełasporcie. Z padrabiaznaściami znajomić The Wall Street Journal.
21‑hadovy kańkabiežac ź Viskonsina (ZŠA) Džordan Štolc užo vyjhraŭ na Alimpijskich hulniach dva załatyja miedali i praciahvaje palavańnie na novyja ŭznaharody. U Miłanie, jak piša WSJ, jon upeŭniena bje alimpijskija rekordy i razburaje nadziei hałandcaŭ — nacyju, dla jakoj kańkabiežny sport ličycca amal śviatyniaj.
Adnak u spartyŭnych kołach usio čaściej hučyć inšaja tema: što było b, kali b Štolc źmianiŭ lod na asfalt i pasprabavaŭ siabie ŭ prafiesijnym viełasporcie?
Heta nie pustaja fantazija. Štolc surjozna trenirujecca na rovary: u mižsiezońnie jon vykarystoŭvaje jaho dla šmathadzinnych trenirovak na vynoślivaść. Na alimpijskich arenach rovar — zvyčajnaja źjava: kańkabiežcy raźminajucca, adnaŭlajucca paśla startaŭ i nakručvajuć lohkija kiłamietry mienavita na ich.
Dva vidy sportu majuć daŭniuju historyju ŭzajemapraniknieńnia: i kańki, i viełasport patrabujuć vybuchovaj mahutnaści, intensiŭnych vysiłkaŭ, zdolnaści ciarpieć bol, a taksama hatoŭnaści mirycca z bytavymi niazručnaściami — u tym liku z vuzkimi łožkami ŭ jeŭrapiejskich hatelach.
Prykłady pierachodu ź lodu na asfalt užo byli. Najbolš viadomy — lehiendarny amierykaniec Eryk Chajden, jakoha ličać adnym z najlepšych kańkabiežcaŭ u historyi. Paśla tryumfu na zimovaj Alimpijadzie 1980 hoda ŭ amierykanskim Łejk-Płesidzie jon dałučyŭsia da kamandy 7‑Eleven u 1980-ja, vyjhraŭ nacyjanalny čempijanat ZŠA, finišavaŭ na «Džyra dJItalija» i navat startavaŭ na «Tur de Frans».
Chajden miarkuje, što Štolc całkam moh by pasprabavać siabie ŭ novym ampłua: «U jaho jość usie fizičnyja zdolnaści», — cytuje jaho vydańnie.
Sam Štolc ideju nie adkidvaje. Paśla pieramohi na dystancyi 500 mietraŭ, jakaja pryniesła jamu druhoje zołata hetaj Alimpijady, jon pryznaŭsia, što «nie suprać byŭ by pasprabavać» i miarkuje, što moh by dobra vystupić na raŭninnym etapie. Letaś padčas «Tur de Frans» jon navat ahučyŭ svaje pikavyja pakazčyki — ad 2100 da 2300 vat. Heta ŭražlivyja ličby: jany pieraŭzychodziać maksimumy, jakija demanstrujuć čatyrochrazovy pieramožca «Tur de Frans» Tadej Pahačar i najlepšyja spryntary śvietu.
Nie dziva, što takija słovy vyklikali cikavaść u kiraŭnikoŭ viełasportu. Hienieralny dyrektar i prezident nacyjanalnaj fiederacyi viełasportu ZŠA USA Cycling Brendan Kvirk žartuje: kali b u alimpijskim sporcie isnavała «tranśfiernaje akno», Štolca ŭžo b padpisali.
Na jaho dumku, havorka idzie pra «spartsmiena pakaleńnia»: aerobnaja baza, mahutnaść i efiektyŭnaść pad nahruzkaj u jaho takija, što fizijałahičny pierachod u viełasport moh by adbycca amal aŭtamatyčna. Da taho ž Štolc užo dakazaŭ psichałahičnuju ŭstojlivaść, zdolnaść ciarpieć dyskamfort i pakazvać vynik u vyrašalnyja momanty.
Jość i finansavy aśpiekt. Viełasport maje hłabalny maštab, i chacia bolšaść honščykaŭ zarablaje ścipła, najbujniejšyja zorki mohuć atrymlivać miljony.
Kiraŭnik amierykanskaj prafiesijnaj viełakamandy EF Pro Cycling, jakaja vystupaje ŭ najvyšejšym dyvizijonie WorldTour i rehularna ŭdzielničaje ŭ «Tur de Frans», Džonatan Voters taksama pryznaŭ, što «padumaŭ by» pra takoha kandydata. Jaho kamanda raniej užo razhladała mahčymaść pracy z kańkabiežcami.
Adnak pry roście 185 sm i vazie kala 82 kh Štolc vyhladaje nie samym typovym kandydatam dla baraćby na hornych etapach. Na krutych i praciahłych padjomach, dzie pieravahu majuć lohkavahaviki, jamu było b ciažka kankuravać. Zatoje ŭ adnadzionnych honkach i spryntach — dyscyplinach, dzie vyrašaje mahutnaść, — jaho šancy vyhladali b značna vyšejšymi.
Sam Štolc pryznajecca, što chacieŭ by vystupać mienavita ŭ adnadzionnych spryntach, bo šmatdzionnyja tury zdajucca jamu zanadta doŭhimi i źniasilvajučymi.
Hałoŭnaja pieraškoda — nie stolki fizičnyja danyja, kolki zdolnaść adaptavacca da chaosu piełatona. Adna sprava — treniravacca ŭ nievialikaj hrupie, i zusim inšaja — u apošnich kiłamietrach zmahacca za pazicyju łokciem u łokać z bolš jak sotniaj elitnych honščykaŭ, jakija niasucca na chutkaści da 80 km/h.
«Piełaton — składanaja reč», — pryznaje Voters. Na jaho dumku, u vypadku pierachodu Štolcu varta było b spačatku prajści škołu moładzievych honak u katehoryi U23, kab nabracca dośviedu pierad vystupami na najvyšejšym uzroŭni.
Kvirk, u svaju čarhu, miarkuje, što karysnym šlacham mahli b stać trekavyja honki na vieładromie — mienavita ź ich kaliści pačynaŭ i Chajden. Vieładrom, jak i kryty kańkabiežny katok, daje mahčymaść asvoić taktyku, pazicyjanavańnie i adčuvańnie honki ŭ bolš kantralavanych umovach.
Zrešty, hety scenar moža tak i zastacca tearetyčnym. Štolc užo staŭ adnoj z hałoŭnych fihur sučasnaha kańkabiežnaha sportu, a jaho alimpijskija pośpiechi tolki pavialičać suśvietnuju viadomaść i patencyjnyja dachody.
Były prafiesijny viełahonščyk Kryścijan Vande Vielde adznačaje, što pačynać u novym vidzie sportu ŭžo darosłym niaprosta ni dla kaho — asabliva kali ŭ apošnich piaci kiłamietrach davodzicca zmahacca za pazicyju na chutkaści 60 km/h. I ŭsio ž, na jaho dumku, pahladzieć na taki ekśpierymient było b nadzvyčaj cikava.
Pakul heta tolki hipoteza. Ale kali samy chutki čałaviek na kańkach kali-niebudź vyrašyć pierasieści na rovar, u śviecie viełasportu jahony krok dakładna nie zastaniecca niezaŭvažanym.
Kańkabiežka ź Niderłandaŭ prylacieła na Alimpijadu pryvatnym džetam, zavajavała zołata i stała seks-simvałam Hulniaŭ
Na Alimpijadzie ŭ Miłanie vystupajuć maci i syn — upieršyniu ŭ historyi! Dla jaje heta ŭžo siomyja hulni
Fanaty Tejłar Śvift abrynulisia z krytykaj na Illu Malinina paśla pravału na Alimpijadzie
Ciapier čytajuć
U Minsku budujuć novaje «Akreścina» ŭ hłuchoj pramzonie. A što budzie sa starym?7
Kamientary