«Siadzić u adzinočcy, vučyć niamieckuju i arabskuju». Źjavilisia naviny pra palitviaźnia Mikołu Dziadka
Aktyvist anarchisckaha ruchu Mikałaj Dziadok adbyvaje svoj 5-hadovy termin źniavoleńnia ŭ hrodzienskaj turmie № 1, kudy jaho pieraviali bolš za hod tamu z kałonii № 9 u Horkach. U jakich umovach znachodzicca Mikałaj Dziadok, napisała «Radyjo Svaboda» na padstavie śviedčańnia daśviedčanaj u jahonych spravach krynicy.
«Siadzić u adzinočnaj kamiery. Na prahułki vyvodziać rehularna, na heta nie skardzicca. Sa zdaroŭjem jość prablemy — straŭnik, hałaŭnyja boli. Ale sprabuje ź imi razabracca. Čarhovuju miedyčnuju banderol dla jaho pryniali biez prablem. Na charčavańnie taksama nie narakaje», — raskazała krynica.
Mikałaj Dziadok maje dva dypłomy ab vyšejšaj adukacyi, viedaje anhlijskuju movu, na jakoj vučyŭsia va ŭniviersitecie ŭ Koŭnie. Pavodle krynicy, palitviazień na hetym vyrašyŭ nie spyniacca i ŭvieś volny čas pryśviačaje samaadukacyi.
«Ciapier jon samastojna vučyć niamieckuju i arabskuju movy, nie zabyvaje i pra anhlijskuju. Siarod knih, jakija jamu ŭdajecca zamaŭlać, u asnoŭnym słoŭniki, daviedniki, padručniki. Arabskaja mova dla jaho nie prosta chobi, ale i prafiesijny zaniatak, bo jahonaja dypłomnaja praca ŭ EHU pryśviačałasia palitałahičnym prablemam na arabskim Blizkim Uschodzie. Kali Mikałaj byvaŭ u Izraili i Iardanii, dyk kantaktavaŭ z arabami na ich rodnaj movie. Ciapier, peŭna, jahonyja viedy arabskaj stali jašče bolšymi», — miarkuje krynica.
Pavodle surazmoŭcy, Mikałaj Dziadok maje mahčymaść telefanavać svajakam, ad jaho dachodziać listy, choć i nie tak časta, jak raniej z kałonii. Taksama Dziadka naviedvaje advakat.
Mikałaja Dziadka aryštavali ŭ listapadzie 2020 hodu ŭ Asipovičach, dzie jon časova žyŭ i vioŭ błoh, u jakim aśviatlaŭ padziei paśla prezidenckich vybaraŭ. Uletku 2021 hoda Mikałaja Dziadka asudzili na 5 hadoŭ źniavoleńnia, pryznaŭšy vinavatym u padrychtoŭcy dziejańniaŭ, jakija hruba parušajuć hramadski paradak, i jašče ŭ dvuch złačynstvach.
Mikałaj Dziadok z-za krataŭ: Dapamahaje trymacca — heta dakładnaje razumieńnie taho, dziela čaho ty ciarpiš
Baćka palitviaźnia Mikoły Dziadka: Padtrymki vielmi nie chapaje
«Ty zaŭsiody paŭtaraŭ, što najlepšaja salidarnaść — praciah baraćby». Vinšavańnie z 40-hodździem palitźniavolenaha Ihara Alinieviča
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie6
Kamientary
P. S. Dievočki, nie ruhajtieś