Zatrymali historyka, adnu z najlepšych znaŭcaŭ biełaruskich tatar Zarynu Kanapackuju
Vučonuju vinavaciać u repostach ź niezaležnych kanałaŭ i foty ź biełaruskaj nacyjanalnaj simvolikaj.
Zarynie Kanapackaj 45 hadoŭ. Jana dačka Ibrahima Kanapackaha, adnaho ź lidaraŭ biełaruskich tataraŭ.
Zaryna skončyła BDPU, zastałasia tam pracavać i tam ža abaraniła kandydackuju dysiertacyju. Da 2021-ha pracavała tam pa sumiaščalnictvie, vykładajučy historyju Biełarusi. Paśla pracavała staršym navukovym supracoŭnikam Instytuta historyi NAN i rychtavała manahrafiju pra biełaruskich tataraŭ, jakaja maje nieŭzabavie vyjści.
Śfiera jaje navukovaha intaresu — biełaruskija tatary i ichniaja kultury i historyja. Zaryna Kanapackaja — navukoviec z suśvietnym imieniem.
Kanapackaj u videa HUBAZiK zakidajuć toje, što jana była padpisana na niezaležnyja kanały i rabiła reposty, rabiła fota ź biełaruskaj nacyjanalnaj simvolikaj, vychodziła na pratesty i zarehistravałasia ŭ čat-bocie płana «Pieramoha». Zajaŭlać pra apošniaje siłaviki časta zmušajuć navat tych zatrymanych, jakija nikoli nie byli zarehistravanyja ŭ tym bocie.
«Navukovamu supracoŭniku kraina stvaryła ŭsie ŭmovy dla daśledavańniaŭ, — havorycca ŭ kanale, źviazanym ź Ministerstvam unutranych spraŭ. — Jana dahetul! (kursiŭ u aryhinale, zachoŭvajem taksama stylistyku — NN) čytała i raspaŭsiudžvała … ekstremisckija materyjały, udzielničała ŭ biesparadkach, niezakonnych akcyjach z nacysckaj bčb-anučaj … Pry hetym nie było nivodnaj padpiski na pradziaržaŭnyja kanały, a asabistyja fota z zabaronienaj simvolikaj jana vykładvała ŭ sacsietkach u 2023 hodzie. Čamu na heta nie źviartali ŭvahu jaje kalehi?» — piša kanał.
«Ekstremisckimi materyjałami» łukašysty nazyvajuć infarmacyju niezaležnych ŚMI. «Nacysckaj bčb-anučaj» — biełaruskuju nacyjanalnuju simvoliku. «Pradziaržaŭnymi» — kanały, jakija absłuhoŭvajuć łukašenkaŭski režym. A «biesparadkami» — mirnyja i zakonnyja akcyi pratestu suprać falsifikacyi vybaraŭ i biezzakońnia.
Čytajcie taksama: Jasinskija, Łuckievičy, Aleksandrovičy i ŭsie našy tatary
Kali vy viedajecie pra toje, što zdaryłasia, bolš, pišycie redaktaru «Našaj Nivy» ŭ TH ci na [email protected].
Albo pišycie asabista tym žurnalistam i redaktaram «Našaj Nivy», jakich vy viedajecie i jakim daviarajecie (lepš — u sihnał ci telehram).
Nahadajem, što masavyja palityčnyja represii ŭ Biełarusi praciahvajucca z 2020 hoda, kali Alaksandr Łukašenka, miarkujučy pa źviestkach z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhraŭ Śviatłanie Cichanoŭskaj, ale nie addaŭ uładu.
Łukašysty pieraśledujuć usich, chto publična vystupaŭ suprać ich kiravańnia i suprać rasijskaha kantrolu nad Biełaruśsiu.
Z 2022 hoda, paśla napadu Rasii na Ukrainu, biełarusaŭ pačali pieraśledavać taksama za antyvajennyja vykazvańni abo simpatyi da Ukrainy.
Zhodna z padlikami pravaabaroncaŭ, za hety čas u krainie adbyłosia nie mienš za 55 tysiač palityčna matyvavanych zatrymańniaŭ. Pa infarmacyi prakuratury, zaviedziena nie mienš za 12 tysiač kryminalnych spraŭ «ekstremisckaj skiravanaści», heta značyć, palityčnaha charaktaru.
«Naša Niva» — bastyjon biełaruščyny
PADTRYMAĆ
Kamientary