73-hadovaha lidara niezaležnych prafsajuzaŭ Vasila Bieraśnieva źmiaścili ŭ špital, patrebna pierasadka nyrki
Sioleta ŭ studzieni palitviaźnia asudzili na dzieviać hadoŭ uzmocnienaha režymu.
Palitźniavolenaha pa «spravie niezaležnych prafsajuzaŭ» Vasila Bieraśnieva, jaki adbyvaje pakarańnie ŭ mahiloŭskaj PK № 15, terminova nakiravali ŭ Mahiloŭski abłasny špital, piša «Viasna».
Jašče padčas znachodžańnia ŭ SIZA ŭ Vasila značna pahoršyŭsia stan zdaroŭja: samaje niebiaśpiečnaje — jon pakutuje ad bolaŭ u adzinaj nyrcy. Adnak situacyja nastolki krytyčnaja, što miedykamientoznaje lačeńnie nie maje sensu. Patrebna pierasadka nyrki. Na šmatlikija prośby i zajavy viaźnia ab akazańni miedyčnaj dapamohi albo nakiravańni na abśledavańnie — doŭhi čas reakcyi nie było. Na fonie prablem sa zdaroŭjem značna pavysiŭsia cisk, i ciapier nieabchodna štodnia prymać adpaviednyja leki.
Pravaabaronca Ihar Kaźmiarčak nie chavaje svajoj zakłapočanaści takoj situacyjaj:
«Sapraŭdy, situacyja krytyčnaja. Kali sapraŭdy nieabchodna pierasadka, treba bić va ŭsie zvany i rabić heta nieadkładna. A ŭvohule — palitviaźnia treba vyzvalać i jak maha chutčej, i dziela hetaha vykarystoŭvać usie mahčymaści.
U takija hady ŭvohule davać takija terminy nie narmalna, ja ŭžo nie kažu pra toje, što jaho abvinavacili ŭ nieisnujučym złačynstvie. Z adnoj nyrkaj i na voli žyć niaprosta, a tut jašče i turma. Tamu Bieraśnieva ŭ pryncypie nielha było sadžać. A pry sioniašniaj situacyi my pavinny jak maha šyrej kazać pra zdaroŭje Vasila Cichanaviča. Faktyčna heta jašče adna sproba prosta davieści palitviaźnia da trahiedyi».
73-hadovy Vasil Bieraśnieŭ — lidar aršanskaha niezaležnaha prafsajuza REP, vykanaŭca abaviazkaŭ staršyni prafsajuza REP. Jaho zatrymali 19 krasavika 2022 hoda ŭ miežach kryminalnaj spravy. Mužčynu źmiaścili ŭ SIZA i vystavili abvinavačvańni:
- u zaklikach da dziejańniaŭ, skiravanych na pryčynieńnie škody nacyjanalnaj biaśpiecy Biełarusi (art. 361 Kryminalnaha kodeksa),
- u stvareńni ekstremisckaha farmavańnia abo ŭdziele ŭ im (art. 361-1 KK),
- u raspalvańni varožaści ci varažniečy (art. 130 KK).
5 studzienia 2023 hoda Vasilu byŭ vyniesieny prysud — dzieviać hadoŭ pazbaŭleńnia voli va ŭmovach uzmocnienaha režymu. Nieŭzabavie palitviaźnia pieraviali ź SIZA-1 u mahiloŭskuju turmu № 4, a ŭ mai — u mahiloŭskuju PK № 15.
Ciapier čytajuć
Raźviedka ZŠA: Biełaruś stała pieradavym vajskovym płacdarmam Rasii31
Kamientary