U Polščy raskryli, kolki ŭsiaho viz było vydadziena biełarusam z pačatku 2021 hoda

Polskaje MZS 15 vieraśnia vyrašyła padzialicca padrabiaznaj statystykaj ab usich vydadzienych vizach (nacyjanalnych i šenhienskich) zamiežnikam i ŭ tym liku biełarusam. U spravazdačy ministerstva robicca admysłovy akcent mienavita na apošnich 30 miesiacach vydačy viz (ci prosta z pačatku 2021 hoda).

«Tak, za apošnija 30 miesiacaŭ usim zamiežnikam było vydadziena amal 2 miljony (1 951176) nacyjanalnych i šenhienskich viz, ź jakich 586 171 — biełarusam, a 990 116 — ukraincam. U toj ža čas vydača viz rasijanam u Polščy značna źniziłasia», — paviedamiła polskaje MZS.

Ministerstva dadało, što bolšaja častka polskich viz biełarusam z pačatku 2021 da pačatku vosieni 2023 była vydadziena dziakujučy Centru vizavych rašeńniaŭ (Centrum Decyzji Wizowych) — viedamstvu, jakoje było stvorana padčas masavaj vysyłki polskich dypłamataŭ ź Biełarusi i jakoje pavinna było padtrymlivać dziejnaść pa vydačy viz biełaruskim hramadzianam. 

Akramia taho, było adznačana, što Polšča ciapier zajmaje tolki 15 miesca siarod astatnich krain Jeŭrasajuza pa kolkaści vydadzienych zamiežnikam jeŭrapiejskich viz (pieršyja try zajmajuć Francyja, Ispanija i Hiermanija).

Ale va ŭsich hetych aficyjnych tłumačeńniach i spravazdačach polskaha MZS jość adna važnaja detal — unutranyja palityčnyja padziei, jakija ciapier adbyvajucca ŭ Polščy.

Jak pišuć bujnyja polskija miedyja (Rzeczpospolita, Onet, Wiadomości, RMF24 i inšyja), u krainie ciapier nabiraje moc surjozny karupcyjny «vizavy skandał», jaki ŭžo zakranuŭ siem byłych i dziejnych polskich čynoŭnikaŭ, siarod jakich jość i niadaŭna zvolnieny namieśnik ministra zamiežnych spraŭ Piotr Vaŭžyk.

Pavodle nacyjanalnaj prakuratury i rasśledavańniaŭ polskich miedyja, Vaŭžyk raspracavaŭ i zaćvierdziŭ miechanizm sproščanaha pryciahnieńnia ŭ Polšču pracoŭnych mihrantaŭ z kala 20 krain Blizkaha Uschodu i Azii kolkaściu da 400 tysiač čałaviek praz tajemnyja ŭkazańni polskim konsulstvam i firmam-pasiarednicam nakont chutkaj vydačy viz ludziam u hetych krainach.

Kiraŭnictva Polščy ŭžo prakamientavała hetaje rasśledavańnie, zajaviŭšy, što «nie ŭsia infarmacyja adpaviadaje rečaisnaści i nieabchodna bolš abjektyŭna aśviatlać padziei».

U toj ža čas polskaja apazicyja na padstavie skandału vystaviła abvinavačańni ŭładam krainy ŭ arhanizacyi nielehalnaj mihracyi praź Biełaruś «dla stvareńnia ŭ vačach hramadzian karciny niebiaśpieki» pierad budučymi vybarami.

• 7
• 0
• 0
• 6
• 5
• 3
• 1
• 0