Pjany biaspraŭnik za śmiarotnaje DTZ na praśpiekcie Puškina atrymaŭ 8 hadoŭ kałonii
Z materyjałaŭ spravy vynikaje, što jon paśla ździajśnieńnia DTZ błytaŭ ślady, kab paźbiehnuć adkaznaści za hibiel dziaŭčyny-piešachoda.
Sud Frunzienskaha rajona Minska asudziŭ minčuka, jaki ŭčyniŭ śmiarotnaje DTZ na staličnym praśpiekcie Puškina, da vaśmi hadoŭ pazbaŭleńnia voli, piša «Sputnik».
DTZ zdaryłasia 18 sakavika 2023 hoda, abvinavačany jechaŭ na aŭtamabili «Subaru» pa praśpiekcie Puškina ŭ Minsku z chutkaściu 98 km/h pry dazvolenaj 60 km/h. Z materyjałaŭ spravy vynikaje, što jon paśla ździajśnieńnia DTZ błytaŭ ślady, kab paźbiehnuć adkaznaści za hibiel dziaŭčyny-piešachoda.
«Prakuratura padtrymała ŭ sudzie dziaržabvinavačańnie ŭ kryminalnaj spravie ŭ dačynieńni da 25-hadovaha minčuka (…) Sudom jamu pryznačana vosiem hadoŭ pazbaŭleńnia voli», — paviedamili Sputnik u sieradu ŭ prakuratury Minska.
Taksama jon pazbaŭleny prava zajmacca dziejnaściu, źviazanaj z kiravańniem usimi vidami transpartnych srodkaŭ, na termin vosiem hadoŭ.
Minčuka sudzili za dva złačynstvy: parušeńnie PDR u stanie ałkaholnaha apjanieńnia, jakoje paciahnuła pa nieaściarožnaści śmierć čałavieka, a taksama za zahadzia łžyvy danos ab učynieńni złačynstva.
Jak paviedamili ŭ prakuratury Minska, ździejśniŭšy DTZ, mužčyna, kab paźbiehnuć pakarańnia, paviedamiŭ pra toje, što nieviadomy źbiŭ jaho i siłaj zavałodaŭ jaho aŭtamabilem, na jakim i było nibyta ździejśniena śmiarotnaje DTZ. Jon patrabavaŭ pryciahnuć hetuju asobu da adkaznaści.
Taksama ŭ časie sudovaha śledstva było ŭstanoŭlena, što kancentracyja etyłavaha śpirtu ŭ kryvi na momant ździajśnieńnia DTZ u jaho była bolš za adno pramile. U takim stanie, nie majučy vadzicielskich pravoŭ, jon jechaŭ pa praśpiekcie z chutkaściu 98 km/h i, straciŭšy kantrol nad darožnaj situacyjaj, na piešachodnym pierachodzie źbiŭ dziaŭčynu, jakaja pierachodziła darohu na dazvalalny sihnał śviatłafora.
Potym vyjechaŭ na sustrečnuju pałasu, dzie sutyknuŭsia z aŭtamabilem «Škoda».
«Ad atrymanych traŭmaŭ dziaŭčyna pamierła na miescy DTZ», — skazali ŭ prakuratury.
Abvinavačany na stadyi dasudovaj vytvorčaści i ŭ sudovym pasiadžeńni całkam pryznaŭ svaju vinu i raskajaŭsia va ŭčynienym. Prysud u zakonnuju siłu nie ŭstupiŭ, jaho možna abskardzić.
Kamientary