Zakryvajuć «OptyKurs» Mikałaja Varabja, jon pratrymaŭsia tolki hod
Akcyjaniery vyrašyli zakryć kredytna-finansavuju arhanizacyju «OptyKurs», jakaja ŭźnikła trochi bolš za hod tamu na miescy Absalutbanka, što patrapiŭ pad amierykanskija sankcyi jak aktyŭ biznesoŭca Mikałaja Varabja — «enierhietyčnaha kašalka» Łukašenki, piša «Biełsat».
24 lipienia adbyŭsia pazačarhovy schod akcyjanieraŭ niabankaŭskaj kredytna-finansavaj arhanizacyi (NKFA) «OptyKurs», praviedzieny ź inicyjatyvy Rady naziralnikaŭ na padstavie rašeńnia Nacbanka RB. Na schodzie pryniataje rašeńnie ab likvidacyi NKFA i ab spynieńni bankaŭskaj dziejnaści.
Na sajcie arhanizacyi aficyjnaja infarmacyja na momant padrychtoŭki materyjału apublikavanaja nie była, adnak źviestki ab pryniatym rašeńni ŭ kantakt-centry ŭstanovy paćvierdzili vydańniu «Lusterka».
Pa pytańniach pahašeńnia kredytaŭ i vykanańnia inšych uzajemnych abaviazkaŭ klijentam «OptyKurs» rajać kamunikavać z novym ułaśnikam, ale chto jon — pakul nieviadoma.
Praviadzieńniu schodu akcyjanieraŭ papiaredničała zajava ad 5 lipienia 2023 hoda, u jakoj «OptyKurs» paviedamiła, što z hetaj daty pahašeńnie raniej vydadzienych kredytaŭ možna zrabić tolki praz ARIP, adździaleńni «Biełpošty» abo bieznajaŭnym płaciažom praź inšyja banki. Taksama abjaŭlałasia ab prypynieńni pracy raźlikova-kasavaha centra na praśpiekcie Niezaležnaści, 95 u Miensku (były hałoŭny ofis Absalutbanka).
Historyja hetaj ustanovy była niepraciahłaj, usiaho tolki hod. 5 lipienia 2022 hoda Absalutbank abjaviŭ pra źmienu nazvy na «OptyKurs» i pieraŭtvareńnie z banka ŭ niabankaŭskuju kredytna-finansavuju arhanizacyju z mahčymaściu akazańnia niekatorych bankaŭskich pasłuh.
Ale pavodle publikacyj na sajcie arhanizacyi zaŭvažna, što ciaham hoda paśla stvareńnia NKFA adbyłosia pastupovaje zakryćcio ŭsich adździaleńniaŭ arhanizacyi, skaraciŭsia da minimumu i śpis apieracyjaŭ, dastupnych dla klijentaŭ.
Absalutbank musiŭ pieratvarycca ŭ «Optykurs» paśla taho, jak u žniŭni 2021 hoda ZŠA ŭviali sankcyi ŭ dačynieńni da kampanij Mikałaja Varabja, Alaksieja Aleksina i Niabojšy Karyča — bujnych biznesoŭcaŭ, jakija ličacca «kašalkami Łukašenki». Sankcyi byli ŭviedzieny za padtrymku režymu, jaki ŭčyniŭ žorstkija represii suprać udzielnikaŭ pratestaŭ 2020 hoda.
Chto zavozić u Biełaruś šakaład Ritter Sport, jaki trapiŭ pad łukašenkaŭskija «kontrsankcyi»?
Prapahanda paviedamiła pra zatrymańnie kiraŭnika kampanii, jakaja budavała «Minsk-Śviet». Voś u čym jaho vinavaciać
Firmu-prakładku dla abychodu sankcyj uznačalvaje staršynia adnaho z vybarkamaŭ 2020 hoda — rasśledavańnie
Ciapier čytajuć
Cichanoŭski raskazaŭ, što treba było rabić u žniŭni 2020-ha18
Kamientary