Reform.by atrymaŭ pryznańnie

Premii taksama ŭdastoilisia ŭkrainskija žurnalisty Sieŭhil Musajeva i Juryj Nikołaŭ, redakcyi OC Media (Hruzija) i «Važnyje istorii» (Rasija).

Reform.by atrymlivaje premiju za «aśviatleńnie situacyi ŭ Biełarusi ŭ asabliva składanych umovach».

«U 2021 hodzie Reform.by byŭ zabłakavany Ministerstvam infarmacyi, jak i ŭsie niezaležnyja biełaruskija miedyja, a pastajannaja redakcyja była vymušanaja źjechać z krainy. Niahledziačy na heta, Reform.by padtrymlivaje suviaź sa svaimi krynicami ŭ Biełarusi i praciahvaje pracavać u vielmi ryzykoŭnych umovach. Akramia źmiastoŭnych intervju, hłybokich kamientaroŭ i raznastajnaści mierkavańniaŭ, płatforma nie ŭ apošniuju čarhu vyłučajecca svaimi žurnalisckimi rasśledavańniami.

Padčas situacyi 2021 hoda na miažy ź Litvoj i Polščaj, spravakavanaj biełaruskim kiraŭnikom Alaksandram Łukašenkam, Reform.by udałosia vyśvietlić, adkul kankretna prybyli ŭciekačy i jak da hetaha byli datyčnyja biełaruskija struktury. Adzin z važnych układaŭ Reform.by — nie tolki aśviatleńnie navin i žurnalisckija rasśledavańni, ale i davańnie płatformy dla refleksii ab raźvićci biełaruskaha hramadstva paśla pratestaŭ 2020 hoda. Vydatny prykład hetamu — prajekt «Piataja respublika», jaki kuryruje Volha Šparaha», — havorycca ŭ pres-relizie.

Premija Free Media Awards zasnavanaja narviežskim fondam Fritt Ord Foundation i niamieckim ZEIT-Stiftung Ebelin und Gerd Bucerius.

Jana štohod prysudžajecca ŭkrainskim, rasijskim i biełaruskim žurnalistam i miedyja ŭ znak pryznańnia ich vybitnaj žurnalisckaj dziejnaści. Premija zaklikanaja ŭzmacnić niezaležnaje aśviatleńnie padziej va Uschodniaj Jeŭropie.

Cyrymonija ŭručeńnia premii adbudziecca ŭ Hamburhu 14 vieraśnia.

Premija była zasnavanaja ŭ 2000 hodzie Fondam ZEIT i nazyvałasia premijaj Hierda Buceryusa dla presy Uschodniaj Jeŭropy (Gerd Bucerius-Förderpreis Freie Presse Osteuropas). Premiju nazvali ŭ honar niamieckaha palityka i žurnalista Hierda Buceryusa. Z 2004 hoda, paśla taho jak Fond ZEIT pačaŭ supracoŭnictva z Fondam svabody słova (Fritt Ord), premija ŭručajecca sumiesna.

Prysudžajecca žurnalistam i miedyja Uschodniaj Jeŭropy, jakija adroźnivajucca jakaściu, prafiesijanalizmam i hramadzianskaj mužnaściu. Arhanizacyi razhladajuć kandydatury paśla kansultacyj sa źniešnimi ekśpiertami. Kožny hod niezaležnaje žury vybiraje pieramožcaŭ na asnovie hetych naminacyj. U hod prysudžajecca ad troch da piaci ŭznaharod.

U rozny čas premiju atrymlivali «Naša Niva», «Brescki kurjer», BDH, «Narodnaja Vola», «Biełarusy i rynak», Intex-press, Śviatłana Kalinkina, BiełaPAN, «Viciebski kurjer», «Salidarnaść», CDMag, «Hazieta Słonimskaja», «Ježiednievnik», «Novy čas», «Barysaŭskija naviny», Maryna Koktyš, Valeryj Karbalevič, Alaksandr Kłaskoŭski. «Biełaruski partyzan», Kaciaryna Barysievič, Kaciaryna Andrejeva, Darja Čulcova, Natalla Łubnieŭskaja, Tut.by, BAŽ.

• 12
• 0
• 0
• 0
• 0
• 0
• 0
• 0