«Mocna schudnieŭ, pracuje na drevaapracoŭcy». Jak adbyvaje žorstki termin miedyjamieniedžar Andrej Alaksandraŭ
Andreja Alaksandrava asudzili na 14 hadoŭ za dapamohu represavanym pa vynikach masavych pratestaŭ 2020 hoda. Biełaruskaj asacyjacyi žurnalistaŭ stali viadomyja niekatoryja padrabiaznaści adsiedki palitviaźnia ŭ papraŭčaj kałonii № 1 u Navapołacku.
Jak i ŭ vypadku z bolšaściu «palityčnych», suviaź z žurnalistam abmiežavanaja: zbolšaha stabilnaje listavańnie tolki z samymi blizkimi svajakami, astatniaja karespandencyja filtrujecca ci naohuł błakujecca.
Stała viadoma, što Andrej Alaksandraŭ pracuje ŭ cechu drevaapracoŭki. Z dośviedu inšych viaźniaŭ kałonii, jakija paśla vychadu demanstravali raźlikovyja listki, miesiacovy zarobak tam redka pieravyšaje niekalki rubloŭ — faktyčna sumy chopić tolki na adzin raz niešta kupić u kramie kałonii.
Chto daŭno znajomy z Andrejem Alaksandravym, toj viedaje, što jon zaciaty spartovy tearetyk i praktyk, sapraŭdnaja «encykłapiedyja» raznastajnaj statystyki, asabliva što tyčycca anhlijskaj futbolnaj Premjer-lihi i ŭlubionaha kłuba «Livierpul». Užo za turemnymi murami «Vaładarki» addany zaŭziatar pierastvaryŭ na biełaruskuju movu kamandny himn You'll Never Walk Alone.
U futboł na amatarskim uzroŭni ŭsio žyćcio hulaŭ i sam: padčas žurnalisckich turniraŭ abaraniaŭ honar infarmkampanii BiełaPAN, dzie ŭ svoj čas byŭ adnym z kiraŭnikoŭ.
Kab nie adstavać ad navin, u kałonii jon vypisvaje spartyŭnaje vydańnie «Presboł», faktyčna heta adzinaja mahčymaść atrymlivać adnosna apieratyŭnuju infarmacyju.
Akramia taho, dziela padtrymańnia fizičnaj formy ŭ hrafiku abaviazkovyja zaradka i praktykavańni. Viadoma, što paśla aryštu Andrej Alaksandraŭ mocna schudnieŭ. Ahułam palitviazień trymajecca badziora i nie hublaje ŭłaścivaha tolki jamu tonkaha pačućcia humaru.
Na pačatku studzienia 2021 hoda «za padrychtoŭku asob dla ŭdziełu ŭ biesparadkach» (tak kłasifikavali dapamohu z apłataj štrafaŭ paciarpiełym ad hvałtu siłavikoŭ) schapili Andreja Alaksandrava i Irynu Złobinu. U žniŭni ich los padzialili Iryna Leŭšyna i Dźmitryj Navažyłaŭ. Da suda ŭsich utrymlivali ŭ SIZA № 1 Minska.
Letaś 6 kastryčnika sudździa Minskaha abłasnoha suda Viačasłaŭ Tulejka ŭ zakrytym režymie ahučyŭ terminy pakarańnia dla abvinavačvanych pa «spravie BiełaPAN». Andrej Alaksandraŭ «zarabiŭ» najbolšy termin — 14 hadoŭ kałonii, Iryna Złobina — 9 hadoŭ, Dźmitryj Navažyłaŭ — 6 hadoŭ, Iryna Leŭšyna — 4 hady. Akramia taho, usim pryznačyli bujnyja štrafy, u pryvatnaści, Andreju Alaksandravu — bolš za 10 tysiač dalaraŭ u ekvivalencie.
Sproby abskardzić nievytłumačalnyja pa svajoj žorstkaści vyraki ŭ Viarchoŭnym sudzie plonu nie mieli.
Jašče da razhladu apielacyi Andreja Alaksandrava pieraviali ŭ SIZA № 2 Viciebska, a jakraz pad dzień naradžeńnia etapavali ŭ navapołackuju papraŭčuju kałoniju № 1.
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary