Chto takija vambaty? Jak łukašystaŭ padzialiła na dva łahiery adno pytańnie
Pohlady niekatorych prychilnikaŭ łukašenkaŭskaj ułady mohuć być zanadta radykalnymi navat dla svaich.
Pytańnie, pa jakim u prychilnikaŭ režymu nie syšlisia pohlady, — padtrymka ruskaha śvietu. Pakul adny prasoŭvajuć naratyvy ruskaha śvietu i paŭsiul bačać «uščamleńnie ruskaj movy» i rusafobiju, inšyja hatovyja zastupicca i za biełaruskuju movu, i časam navat za łacinku.
Tych, chto za ruski śviet, inšy łahier nazyvaje «vambatami». Mianuška naradziłasia dziakujučy internet-miemu, imavierna, pra toje, što ekskremienty vambata majuć kvadratnuju formu.
Dakładnyja pryčyny vybaru akurat hetaha aznačeńnia dla prychilnikaŭ ruskaha śvietu nazvać składana.
«Vambaty» — heta sinonim «kałaradaŭ», jak piša ŭ svaim kanale praŭładnaja mastačka Śviatłana Žyhimont.
Chto ž da jakoha łahiera naležyć?
U hrupie padtrymki ruskaha śvietu — praŭładnaja mastačka Śviatłana Žyhimont (jana napisała pastaralny partret Łukašenki pad drevam), prarasijskaja aktyvistka Volha Bondarava i jaje kamanda. Inšyja piersanažy — mienš viadomyja.
Jany ŭsurjoz zakłapočanyja, što na šyldach u haradach i muziejach mała ruskaj movy. «Miakkaja pałanizacyja» — takuju pahrozu prychilniki ruskaha śvietu bačać u łacincy i biełaruskaj movie, a taksama ŭ nacyjanalnych kaštoŭnaściach.
U inšym łahiery — historyk i deputat Ihar Marzaluk, kiraŭnik ANT Marat Markaŭ (a taksama inšyja supracoŭniki kanała), Illa Biehun (jon u 2020-m vydavaŭ siabie za prychilnika pieramien).
Niekatoryja z łukašystaŭ u hety łahier zapisvajuć i prapahandysta Ryhora Azaronka.
«Ja biełaruskuju movu nikoli nie miłavaŭ. Usio ž vyras u horadzie, asiarodździe było pahałoŭna ruskamoŭnaje, siamja dyk uvohule z usiaho SSSR, miascovych niama nikoha. Ale voś apošni hodzik-dva prychodžu da dumki, što jość rečy, jakija treba abierahać, navat kali ciapier ty ŭ ich nie bačyš patreby. Mnohija rečy prychodziać z uzrostam. I značna kryŭdniej, kali momant prapuściŭ i ŭžo da momantu, kali ty paśpieješ pahruzicca ŭ tuju ž kłasiku miascovaj litaratury abo tyja ž teatralnyja pastanoŭki, hetaha nie budzie. Stracić movu vielmi lohka. Viarnuć ža niemahčyma», — pisaŭ Biehun u svaim kanale.
Pra Žyhimont i Bondaravu jany pišuć jak pra ludziej, jakija tolki prykryvajucca patryjatyzmam, a papraŭdzie škodziać dziaržavie.
«Ich «biełorusskaja mojva», «Biełarusi nužna totalnaja dienacifikacija», «płoška pieramochi», «obriezannaja viersija podviha», «minzdoch», «nacistskaja blevotina», «profnieprihodnyj ministr», i ŭsie inšyja «zasłuhi» pierad ajčynaj pavinny całkam pierakreślić usiakuju mahčymaść źviartacca da dziaržavy sa svaimi chaciełkami i danosami, pakul karma nie budzie adnoŭlenaja», — pisała ŭ svaim telehram-kanale režysiorka ANT Natalla Ždanovič.
Amatary ruskaha śvietu ŭ svaju čarhu zaklikajuć bajkatavać ANT.
U niejki momant sprečka navat vyjšła za miežy asabistych kanałaŭ łukašystaŭ — telekanał ANT zapościŭ źjedlivy dopis pra «vambataŭ» u svoj telehram-kanał.
U svajoj pazicyi abodva łahiery padtrymlivajuć Łukašenku. Tolki adny ličać nacyjanalnyja kaštoŭnaści pahrozaj paradku, a inšyja — važnym składnikam suvierenitetu, ale choć i ŭ svajoj interpretacyi.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary
ci čamuści (z-za svajho prystasavanstva, naprykład) nie žadaje bačyć, što ich pravadyr - taki samy vatnik, jaki ich pryviadzie ŭ tuju ž rf, tolki trochi bolš źvilistym šlacham.
Vombat-batiania, batiania-vombat,
Prihnał on na ulicy v maskach sołdat.
Vźletajut rakiety, i tanki koptiat - siuda ich vpustił your vombat.