Ukraina paviedamiła pra padazravanaha ŭ rasstrele mirnych žycharoŭ u Bučy. Heta rasijski vajskovy navodčyk-apieratar
U sieradu ofis Hienieralnaj prakuratury Ukrainy paviedamiŭ pra padazravanaha, jaki, pavodle viersii śledstva, rasstralaŭ mirnych žycharoŭ u dvuch cyvilnych aŭtamabilach. Heta adbyłosia ŭ Bučy Kijeŭskaj vobłaści ŭ sakaviku 2022 hoda padčas rasijskaj akupacyi.
Hienprakuratura śćviardžaje, što heta 24-hadovy rasijski vajskoviec, namieśnik kamandzira, navodčyk-apieratar BMD-2 z bartavym numaram 111, jaki słužyŭ u 76 hvardziejskaj desantna-šturmavoj Čarnihaŭskaj dyvizii PDV RF, piša Bi-bi-si.
Jamu inkryminavana parušeńnie zakonaŭ i zvyčajaŭ vajny, spałučanaje z naŭmysnym zabojstvam (č. 2 art. 28, č. 2 art. 438 KK Ukrainy).
Pa danych śledstva, ranicaj 5 sakavika 2022 hoda pa ŭkazańni kamandzira kałona bajavych mašyn rasijskaj armii pačała ruch z terytoryi dziciačaha łahiera «Pramianisty» ŭ napramku lasnoj zony kala vioski Zdźvižaŭka.
Maršrut pralahaŭ pa vulicy Lecha Kačyńskaha da horada Buča. Nasustrač vajskovaj kałonie vyjechali dva aŭtamabili ź mirnymi žycharami, u tym liku z dvuma dziećmi. Pa zahadzie rasijskich kamandziraŭ byŭ adkryty ahoń z 30 mm aŭtamatyčnaj harmaty 2A42 pa transpartnych srodkach, śćviardžajuć ukrainskija śledčyja.
Čatyry čałavieki atrymali śmiarotnyja ranieńni: maci, dvoje małaletnich dziaciej i ich susied, — inšyja byli paranienyja.
Zaraz viaducca pracesualnyja dziejańni pa pryciahnieńni da adkaznaści inšych saŭdzielnikaŭ vajennaha złačynstva.
Ciapier čytajuć
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami26
Kamientary