«Hary i Miehan pierabolšyli niebiaśpieku paparacy». Taksist, jaki padvoziŭ paru, raspavioŭ svaju viersiju historyi
Taksist Suchčarn (zvyčajna nazyvaje siabie Soni) Sinhch, jaki ŭ aŭtorak u Ńju-Jorku padvoziŭ prynca Hary i Miehan Markł, zajaviŭ, što ich apovied pra pahoniu za imi paparacy i pahrozu ich žyćciu jak minimum pierabolšany.
Napiaredadni aficyjny pradstaŭnik Hary i Miehan paviedamiŭ, što para ledź nie raźbiłasia, pakul na praciahu dźviuch hadzin ich mašynu praśledvali fatohrafy-paparacy, piša Bi-bi-si.
Incydent, pavodle jaho słoŭ, adbyŭsia ŭ Ńju-Jorku, paśla naviedvańnia mužam i žonkaj dabračynnaha viečara, dzie Miehan atrymlivała ŭznaharodu za svaju pracu ad Ms Foundation Women of Vision.
Taksist udakładniaje, što, mahčyma, staŭ śviedkam tolki častki historyi, ale ŭ toj momant, kali para znachodziłasia ŭ jaho taksi (kala 10 chvilin), nie było ni pahoni, ni niebiaśpiečnaha kiravańnia ź jaho boku.
Pa słovach Sinhcha, Hary i Miehan sapraŭdy niervavalisia, ale nijakaj źniešniaj pahrozy ŭ ich dačynieńni nie nazirałasia.
«Ja nie dumaju, što [ich apovied] praŭdzivy, jany mocna pierabolšvajuć. Ničoha takoha nie było», — skazaŭ taksist reparcioram.
Jon paćvierdziŭ, što paparacy jechali za jaho taksi, ale jany nie pavodzili siabie ahresiŭna, trymali dystancyju i nijakaj niebiaśpieki nie było. Pry hetym Sinhch nie vyklučaje, što prync i jaho žonka mahli trapić u niepryjemnuju situacyju da taho, jak sieli da jaho.
Soni Sinhch padabraŭ ich kala adnaho z palicejskich učastkaŭ Manchetena, dzie, pa słovach pradstaŭnika pary, jany sprabavali schavacca ad pahoni, jakaja pačałasia, jak tolki jany sieli ŭ mašynu paśla dabračynnaha viečara.
«Ja stajaŭ na 67-j vulicy, mianie naniaŭ niejki achoŭnik. U nastupny momant da mianie ŭ mašynu sieli prync Hary i jaho žonka. Na šlachu nam pierakryŭ darohu śmiećciavoz, i niečakana padjechali paparacy i pačali fatahrafavać. Achoŭnik zahadaŭ viarnucca nazad da palicejskaha ŭčastka», — raspaviadaje Soni Sinhch.
Hary i Miehan vietliva raźvitalisia ź im i spytali, jak jaho zavuć. Achoŭnik zapłaciŭ jamu 50 dalaraŭ, što zanadta šmat dla takoj karotkaj pajezdki, ale heta z ulikam čajavych, skazaŭ Soni.
Palicyja Ńju-Jorka paćviardžaje, što ŭ aŭtorak viečaram prynca Hary i Miehan praśledavali paparacy, parušajučy praviły darožnaha ruchu.
Fotazdymki muža i žonki ŭ taksi, jakija źjavilisia na roznych płatformach tym ža viečaram, taksama śviedčać pra pieraśled.
Adzin z fatohrafaŭ, adnak, taksama raspavioŭ pra napružanuju situacyju, kali jon sprabavaŭ nie adstać ad mašyny z Hary i Miehan. Jon vystupaŭ ananimna ŭ ranišniaj prahramie brytanskaha telekanała ITV.
«Jany šmat błakavali, było šmat roznaha rodu manieŭraŭ, kab spynić toje, što adbyvałasia. Kali heta było niebiaśpiečna i katastrafična, to, chutčej za ŭsio, praź dziejańni čałavieka za styrnom», — dadaŭ fatohraf.
Fotaahienctva Backgrid USA paćvierdziła, što atrymała fatahrafii Hary i Miehan u mašynie ad fatohrafaŭ, «try ź jakich jechali na mašynach i adzin na rovary».
U ahienctvie abiacali pravieryć skarhi na pavodziny fatohrafaŭ, ale dadali, što, pa słovach samich paparacy, nijakich niebiaśpiečnych zbližeńniaŭ i patencyjna avaryjnych situacyj nie było.
«Važna adznačyć, što ŭ hetych fatohrafaŭ jość prafiesijny abaviazak aśviatlać vartyja aśviatleńnia padziei i piersanalii, u tym liku takija publičnyja fihury, jak prync Hary i Miehan Markł», — skazali ŭ fotaahienctvie.
Adnak Hary i Miehan u svajoj zajavie śćviardžajuć, što situacyja pahražała ich žyćciu.
«Učora ŭviečary hiercah i hiercahinia Sasekskija [tytuły Miehan i Hary] ledź nie raźbilisia padčas aŭtamabilnaj pahoni z udziełam hrupy vielmi ahresiŭnych paparacy, — skazana ŭ zajavie pary. — Upartaja pahonia, jakaja praciahvałasia bolš za dźvie hadziny, pryviała da mnostva situacyj, kali ledź nie adbylisia sutyknieńni ź inšymi kiroŭcami, piešachodami i dvuma aficerami ńju-jorkskaj palicyi».
«Raspaŭsiudžvańnie hetych fatahrafij — z ulikam taho, jakim čynam jany byli atrymanyja — pryvodzić da zaachvočvańnia praktyki, jakaja ŭjaŭlaje niebiaśpieku dla ŭsich datyčnych bakoŭ i źjaŭlajecca ŭvarvańniem u asabistaje žyćcio», — taksama skazana ŭ zajavie.
Prync Hary nieadnarazova zajaŭlaŭ, što adnoj z pryčyn, jakija padšturchnuli jaho da sychodu ad spraŭ karaleŭskaj siamji i pierajezdu ŭ ZŠA było žadańnie zaścierahčy svaju siamju ad praźmiernaj uvahi presy.
Pavodle jaho słoŭ, jon baicca, što Miehan Markł moža paŭtaryć los jaho maci pryncesy Dyjany, jakaja zahinuła ŭ avaryi padčas pieraśledu fatohrafaŭ-paparacy.
Ale, źjechaŭšy ź Vialikabrytanii, Hary i Miehan nie źnizili ŭzrovień svajoj publičnaści, jak mieli namier. Jany ŭdzielničajuć u cyrymonijach, dajuć intervju i svaimi časam skandalnymi zajavami vyklikajuć pavyšanuju ŭvahu presy.
Ciapier čytajuć
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary