Častyja ratacyi kamandavańnia US RF dadajuć chaosu i źnižajuć efiektyŭnaść kiravańnia armijaj — ISW

Ekśpierty zhadvajuć historyi kamandujučych Alaksandra Dvornikava, Hienadzia Žydko, Siarhieja Suravikina, Alaksandra Łapina, Michaiła Ciaplinskaha, Aleha Makareviča i inšych ludziej, jakija to byli apieratyŭna zvolnienyja sa svaich pasad, to viartalisia z apały z pavyšeńniem.

ISW śćviardžaje, što pieršapačatkova Pucin nie chacieŭ pryznačać kamandujučaha ŭvarvańniem, kab pradstavić chutkuju pieramohu jak svaju zasłuhu. Ekśpierty pravodziać paraleli z supraćstajańniem Iosifa Stalina i Hieorhija Žukava padčas Druhoj suśvietnaj vajny. Pucin nie chacieŭ, kab źjaviłasia asoba, jakaja mahła by adciahnuć uvahu na siabie.

Pavialičyć

Ale chutkaj pieramohi nie zdaryłasia. Kamandujučaha vojskami pryznačyć pryjšłosia. Vośmaha krasavika 2022 hoda im staŭ Alaksandr Dvornikaŭ. Tady ž Pucin pastaviŭ jamu zadaču całkam zachapić Danieckuju vobłaść da Dnia Pieramohi 2022 hoda. Dvornikaŭ hetych met nie dasiahnuŭ. Užo 26 maja jamu na źmienu pryjšoŭ Hienadź Žydko.

Abodva kamandziry vykonvali dvajnuju rolu — akramia kiravańnia hrupoŭkaj rasijskich vojskaŭ va Ukrainie, jany zastavalisia kiraŭnikami svaich vajskovych akruhaŭ, to-bok byli nie vyšejšymi nad inšymi, a «pieršymi siarod roŭnych». ISW źviazvaje takoje kadravaje rašeńnie Pucina ź niežadańniem davać hienierałam paŭnatu ŭłady, a taksama kab mieć mahčymaść prybirać ich paśla niaŭdač biez mocnaha panižeńnia, a paśla viartać pa patrebie.

ISW spyniajecca na asobie kiraŭnika Hienštaba Valeryja Hierasimava. Ekśpierty raspaviadajuć, jak Pucin to pierakonvaŭsia ŭ efiektyŭnaści antyhierasimaŭskaj frakcyi, u pieršuju čarhu PVK «Vahnier» i vojskaŭ Kadyrava, to znoŭ pryznačaŭ na vyšejšyja pasady padnačalenych kiraŭnika Hienštaba. Padobnyja dziejańni, miarkuje ISW, parušali płanavańnie apieracyj.

Pryznačeńnie Siarhieja Suravikina kamandujučym uvarvańniem vyklikała ŭzdym efiektyŭnaści dziejańniaŭ PVK «Vahnier». Umacavańnie ich pazicyj «niervavała mnohich» jak u Kramli, tak i ŭ Ministerstvie abarony. Paśla ŭziaćcia Saladara ź niepraparcyjnymi stratami, da studzienia 2023 hoda Hierasimaŭ zmoh pierakanać Pucina viarnuć zvolnienych kamandziraŭ — Łapina, Dvornikava i inšych, a taksama pryznačyć siabie na miesca Suravikina.

Tak u kamandavańni kančatkova skłałasia «dvuchpartyjnaja» sistema — prychilnikaŭ i praciŭnikaŭ Hierasimava, što ŭniesła jašče bolšy chaos u kiravańnie vojskami i pastajannuju baraćbu padraździaleńniaŭ adno z adnym.

U niekatorych dziejańniach ekśpierty navat bačać pomstu adnych inšym z-za padrychtoŭki suicydalnych zadańniaŭ abo abmiežavańniaŭ u čałaviečych i łahistyčnych resursach. 

ISW miarkuje, što Pucin sprabuje zachoŭvać bałans pamiž dźviuma hetymi hrupoŭkami. Tym nie mienš, Hierasimavu najbližejšym časam naŭrad ci pahražaje adstaŭka, bo heta ŭdaryć pa reputacyi Kramla i imidžy Ministerstva abarony jak adzinaj struktury. Taksama ekśpierty źviartajuć uvahu na toje, što Pucin nie ličyć Hierasimava za čałavieka, jaki moža padarvać jaho aŭtarytet jak lidara ŭvarvańnia va Ukrainu.

• 5
• 0
• 6
• 0
• 0
• 0
• 0
• 0