U ZŠA aryštavali biełarusa za abychod antyrasijskich sankcyj na $150 miljonaŭ
Siarhieja Karpuškina abvinavačvajuć u abychodzie sankcyj u intaresach biznesoŭca Siarhieja Kurčanki.
Ułady ZŠA aryštavali hramadzianina Biełarusi Siarhieja Karpuškina pa abvinavačvańni va ŭdziele ŭ schiemie pa abychodzie antyrasijskich sankcyj na $150 młn, havorycca ŭ zajavie amierykanskaha Miniusta.
«Hramadzianin Biełarusi — 46-hadovy Siarhiej Karpuškin z Majami — byŭ aryštavany i abvinavačany ŭ fiederalnym złačynstvie ŭ suviazi z udziełam u schiemie parušeńnia sankcyj ZŠA», — skazana ŭ paviedamleńni.
Pavodle źviestak Miniusta, Karpuškin i jaho saŭdzielnik — žychar štata Fłaryda Džon Unsałan, — ciaham troch hadoŭ udzielničali «ŭ schiemie z metaj abychodu amierykanskich sankcyj, uviedzienych u dačynieńni da aliharcha Siarhieja Kurčanki». Śledstva miarkuje, što jany zakupili dla dvuch źviazanych z Kurčankam kampanij stalepłavilnyja materyjały na $150 młn.
Biełarusu stavicca ŭ vinu złačynnaja zmova z metaj abychodu abo parušeńnia amierykanskich sankcyj. U vypadku pryznańnia vinavatym jamu pahražaje da 20 hadoŭ turemnaha źniavoleńnia.
Kurčanka — hramadzianin Ukrainy. Paśla Jeŭramajdana jon pierajechaŭ u Biełaruś, a zatym u Maskvu. Słužba biaśpieki Ukrainy raniej śćviardžała, što Kurčanka ŭ parušeńnie ŭkrainskaha zakanadaŭstva atrymaŭ rasijskaje hramadzianstva. Pry Viktary Janukovičy jon byŭ adnym z najbahaciejšych ludziej Ukrainy i ličyŭsia adnym z najbujniejšych u krainie handlaroŭ vuhlevadarodami.
Pad zachodnija sankcyi biznesoviec trapiŭ u krasaviku 2022 hoda. U ES zajaŭlali, što jon «pry padtrymcy prarasijskich sieparatystaŭ» uziaŭ pad svoj kantrol niekalki bujnych mietałurhičnych, chimičnych i enierhietyčnych zavodaŭ u Danbasie, a jaho kampanija «Haz-Aljans» manapalizavała zdabyču vuhalu ŭ rehijonie. Składalniki śpisu taksama miarkujuć, što Kurčanka «atrymaŭ vyhadu ź niezakonnaj schiemy ekspartu danbaskaha vuhalu ŭ Rasiju i Jeŭropu nasupierak sankcyjam ES» praz rasijskija party, pastaŭlaŭ paliva ŭ Krym i dapamahaŭ inšym kampanijam abychodzić sankcyjnyja abmiežavańni.
Kamientary