Ajcišnikaŭ, jakija źjechali, kličuć u kamisiju pa zaniataści raskazać pra svaju «ciažkuju žyćciovuju situacyju»
Ajcišnikam-rełakantam stali prychodzić «listy ščaścia» z rekamiendacyjami źviarnucca ŭ kamisiju zaniataści, kab paćvierdzić, što jany pracujuć. Abo možna raskazać pra svaju «ciažkuju žyćciovuju situacyju», aformicca ramieśnikami, pieravučycca — z harantyjaj pracaŭładkavańnia, piša dev.by.
Adzin z adrasataŭ — u minułym vykładčyk BDU. Jamu daviałosia razarvać kantrakt z VNU i zvolnicca «praz toje, što źvierchu spuścili śpisy niepažadanych supracoŭnikaŭ».
Ad žniŭnia minułaha hoda małady čałaviek žyvie za miažoj. Dniami na jahony biełaruski adras pryjšoŭ list. U im havorycca, što kamitet pa pracy Minharvykankama prapanoŭvaje jamu «pieranavučańnie i harantavanaje pracaŭładkavańnie».
— Hublajusia ŭ zdahadkach, jak jany b vykonvali hetyja harantyi, kali b ja chadziŭ da pracadaŭcaŭ z charaktarystykaj z raniejšaha miesca pracy, u jakim ja ŭ śpisach niepažadanych, — napisaŭ čytač.
Jon rastłumačyŭ, što ŭ 2022 hodzie padčas pracaŭładkavańnia ŭ BDU ŭ kandydataŭ prasili charaktarystyki z papiaredniaha miesca pracy.
«I ludzi śmiajalisia, što ŭ kalehi, jaki nie byŭ udzielnikam pratestaŭ, było paznačana štości nakštałt «moža skazać słova ŭpopierak načalstvu».
Inšy atrymalnik rassyłki — dyzajnier, nie žyvie ŭ Biełarusi ŭžo 3 hady. Na pačatku tydnia jahonyja baćki zabrali z paštovaj skryni pa miescy prapiski list «z rekamiendacyjaj aformicca jak ramieśnik i płacić padatak». Małady čałaviek žartuje, što jamu śpiecyjalna prapanavali «miakkuju» formu finansavańnia ekanomiki, bo na inšuju jon nie pahodzicca — bo daŭno ŭžo nie ŭ krainie.
Ale naohuł jon miarkuje, što ŭsio praściej — prosta «spuścili płan pa pracaŭładkavańni darmajedaŭ».
Teściroŭščyca, jakaja źjechała ŭ Litvu hod tamu i ciapier siadzić na benčy, taksama atrymała list z rekamiendacyjaj źviarnucca ŭ darmajedskuju kamisiju — i raskazać pra «ciažkuju žyćciovuju situacyju».
— O, ja b raskazała, — žartuje dziaŭčyna. — Navat cikava, što mnie mahli b prapanavać, uličvajučy, što ŭ majoj kampanii konkurs na prajekt — pad 100 čałaviek.
— List pryjšoŭ litaralna siońnia, — napisaŭ jašče adzin čytač. — Ja patelefanavaŭ pa numarach, napisanych u liście, mianie paznačyli jak niezaniataha ŭ ekanomicy.
Čamuści papiaredzili pra mahčymyja prablemy na miažy, bo hetuju bazu bačyć pamiežny kamitet. Vyraznaha adkazu, čamu ŭ mianie buduć prablemy i jakija, nie dali. Skazali: «Usio tak mianiajecca štodnia».
Małady čałaviek u razmovie ŭdakładniŭ, što žyvie ŭ Turcyi, jon maje dazvoł na žycharstva. Tady hołas na inšym kancy trubki zaŭvažyŭ: kali jość dazvoł, to prablem, zdajecca, i «nie maje być».
Jašče adzin čytač, atrymaŭšy «list ščaścia» adpraviŭ na poštu, paznačanuju ŭ im, pracoŭnuju damovu (jon aformleny na pracu ŭ Rasii, ale žyvie ŭ inšaj krainie).
— Adkazali, što ŭsio dobra. I kali znoŭ pryjdzie list, mnie varta dziejničać pa toj ža schiemie. Kali na rukach pracoŭnaja damova ŭ krainie JEAES, to ja nie ŭvažajusia za darmajeda.
A jašče adnamu čytaču pryjšła SMS na jahony biełaruski numar (mabilny apieratar — A1) z rekamiendacyjaj źviarnucca ŭ kamisiju zaniataści.
Daviedka. Zhodna z pastanovaj Saŭmina № 166, ad sakavika minułaha hoda biełarusy, jakija vyjechali pa-za miežy Biełarusi na termin bolšy za 30 dzion i nie zaniatyja ŭ ekanomicy, abaviazanyja apłačvać žyllova-kamunalnyja pasłuhi ŭ poŭnym abjomie. Vyklučeńnie — kali čałaviek, jaki źjechaŭ, pracuje ŭ krainach JEAES, to-bok u Rasii, Kazachstanie, Kyrhyzstanie abo Armienii (kali pracuješ u ES, to ŭsio roŭna ličyšsia darmajedam).
Kali rełakant nie źjaŭlajecca ŭłaśnikam žytła, patrabavańnie apłačvać «kamunałku» napoŭnicu na jaho nie raspaŭsiudžvajecca.
Kali ž jon ułaśnik, ale pražyvaje nie adzin, — to ŭ poŭnym abjomie jon płacić tolki za svaju dolu — prynamsi, tak tłumačać čynoŭniki.
«Za pustuju kvateru zapłaciŭ pad 190 rubloŭ, nie pracavaŭ navat chaładzilnik». Biełaruskija dalnabojščyki ŭ šoku ad svaich žyrovak
U Brasłaŭskim rajonie ŭ bazu «darmajedaŭ» unieśli 10% nasielnictva
«Nie pracujuć, a sacpasłuhi atrymlivajuć, jak usie. Niespraviadliva» — Łukašenka znoŭ uziaŭsia za «darmajedaŭ»
Kamientary