U Polščy pačaŭsia sud nad ukraincam, jaki sprabavaŭ zarezać biełarusa
Incydent pamiž ukraincam i biełarusam u Polščy adbyŭsia praz tydzień paśla poŭnamaštabnaha ŭvarvańnia rasijskich vojskaŭ va Ukrainu. Ciapier nad ukraincam, jaki nanios niekalki nažavych udaraŭ biełarusu, pačaŭsia kryminalny praces.
34-hadovaha hramadzianina Ukrainy Maksima V. abvinavačvajuć u zamachu na zabojstva: hod tamu jon nanios niekalki ŭdaraŭ nažom biełarusu. Jon byŭ zatrymany palicyjaj adrazu ž paśla incydentu, i ŭvieś hety čas jaho ŭtrymlivali pad vartaj, piša na padstavie paviedamleńniaŭ polskaj presy vydańnie Most.
«Ja nie pryznaju siabie vinavatym, — padkreśliŭ u sudzie abvinavačany. — Heta jon napaŭ na mianie. Ja zabraŭ u jaho nož, i ŭ toj momant, kali zabiraŭ, to paraniŭ jaho. Jon vybieh na vulicu, kali ŭ mianie ŭ rukach apynuŭsia nož. Ja kryčaŭ jamu: «Što ty robiš?» I paśla vykinuŭ hety nož. Ja zabraŭ jaho rečy z vulicy, prajšoŭ 200 mietraŭ i mianie zatrymali palicyjanty».
Padsudny zrabiŭ prapanovu sudździam.
«Ja b chacieŭ damovicca. Niama sensu siadzieć u Polščy. Ja nie ŭjaŭlaju nijakaj pahrozy. Ja chaču ekstradycyi va Ukrainu. Tam hinie šmat ludziej, i ja mahu adkazvać z Ukrainy. Ja tam patrebny, Ukraina pavinna pieramahčy. Ja raźličvaju na spraviadlivy prysud».
Advakat ukrainca źviarnuŭsia da paciarpiełaha biełarusa z zapytam ab miedyjacyi. Ale toj admoviŭsia ad takoj mahčymaści.
«Paciarpieły nie zhodny. Pa-pieršaje, heta technična niemahčyma. A pa-druhoje, jon nie adčuvaje nieabchodnaści ŭ prymireńni. Hetaja padzieja nakłała vialiki adbitak na jaho žyćcio, lačeńnie ŭsio jašče praciahvajecca», — adznačyŭ advakat paciarpiełaha.
Samoha biełarusa ŭ zale suda nie było. Pa słovach advakata, u jaho ŭźnikli prablemy z atrymańniem vizy dla ŭjezdu ŭ Polšču.
Za zamach na zabojstva Maksimu V. pahražaje ad vaśmi hadoŭ da pažyćciovaha źniavoleńnia.
Zdareńnie adbyłosia 1 sakavika 2022 hoda ŭ vioscy Kazłoŭka niedzie kala 30 kiłamietraŭ ad Lublina. Biełarus Jaŭhien B. pryjechaŭ na zarobki, u toj miascovaści jon pavinien byŭ adbyć karancin. Maksim V. žyŭ u tym samym domie. Pa viersii prakuratury, kali biełarus pieranosiŭ rečy z adnaho pakoja ŭ inšy, na jaho napaŭ abvinavačany, jaki nanios udar nažom u śpinu, ale trapiŭ u plačo. Jaŭhien adšturchnuŭ napadnika, ale abvinavačany praciahvaŭ atakavać dalej. Paciarpieły zmoh pierakulić stoł, zatrymać napadnika, uciačy z domu i paprasić pra dapamohu.
Palicejskija zatrymali Maksima adrazu ž paśla incydentu. U jaho pry sabie znajšli rečy, jakija naležać biełarusu: telefon, kašalok z najaŭnymi i dakumientami. Kali ŭ jaho zapatrabavali rastłumačyć situacyju, to toj adkazaŭ: «Heta za vajnu». Ukrainiec raskazaŭ śledčym, što svarka adbyłasia praz vajnu. Pavodle jaho, biełarus admaŭlaŭ, što rasijskija vojski napali na Ukrainu taksama i ź Biełarusi.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary