«Siabry nazyvajuć mianie buślikam». Akazvajecca, jość takaja prafiesija — pieravozčyk embryjonaŭ
Aficyjnaja nazva pracy ŭ Dźmitryja — kurjer pa zabory bijałahičnaha materyjału. Siabry žartam nazyvajuć jaho buślikam. Na samaj spravie jon pieravozić embryjony dla tych siemjaŭ, jakija vyrašylisia pajści na praceduru ekstrakarparalnaha apładnieńnia, kab zajmieć doŭhačakanych dziaciej. Homielski sajt «Štodzień» parazmaŭlaŭ ź pieravozčykam embryjonaŭ pra jaho prafiesiju.
— Ci cikavaja ŭ ciabie praca?
— Praca vielmi cikavaja, bo ty vandruješ pa roznych krainach, sustrakaješsia z novymi ludźmi. Heta pastajanny ruch, pieraloty. Siońnia ja znachodžusia ŭ adnoj krainie, zaŭtra — u inšaj.
— Ci jość strach, što niešta zdarycca z takim kaštoŭnym hruzam? Jakija ŭvohule isnujuć praviły pieravozak embryjonaŭ?
— Zaŭždy prysutničaje niejkaja ryzyka. Ale hruz pieravozicca ŭ śpiecyjalizavanych jomistaściach, jakija važać prykładna kiłahramaŭ z 10. Sami embryjony, zrazumieła, nie ciažkija, važać admysłovyja jomistaści. Jość admysłovyja praviły pieravozki. Naprykład, kantejnier musić być zaŭždy ŭ viertykalnym stanoviščy, jaho nielha kulać, razmachvać im. U jomistaści znachodzicca azot. Adnak pierad palotam jaho ŭ klinicy źlivajuć, bo ŭ samalot z azotam nielha. U jomistaści zastajucca pary azotu. Hetych paroŭ chapaje prykładna na troje sutak, bo nakryŭka ŭ jomistaści, dzie pieravoziacca embryjony, — ščylnaja. Potym hruz pryvoziš i jaho zapraŭlajuć znoŭ u klinicy. Jomistaść u bahaž nie zdajecca, biarecca z saboj jak ručnaja pakłaža.
— Ci dumaŭ kali-niebudź, što ŭ ciabie budzie takaja praca?
— Nikoli nie dumaŭ. Ja navat nie viedaŭ, što jość takaja praca na śviecie. Aficyjna maja praca nazyvajecca kurjer pa zabory bijałahičnaha materyjału.
— Ci ciažka prachodzić miažu, kali viazieš embryjony?
— Niaciažka. Z saboj u mianie supravadžalnyja dakumienty, analizy z klinik, davieranaść ad ludziej, što ja mahu pieravozić ich bijałahičny materyjał.
— A jakaja reakcyja siabroŭ i znajomych, kali čujuć, kim ty pracuješ?
— Buślikam, jaki prynosić dziaciej, mianie nazyvajuć. Jašče zdarajecca, što achova ŭ mietro žartuje. Pytajuć: «Heta vy svaje analizy vieziacie ŭ takim čamadanie? Hy-hy-hy».
— Ci adčuvaješ niejkuju misiju, kali pieravoziš taki važny hruz?
— Kaniešnie, bo ja niasu radaść ludziam (śmiajecca). Papaŭniaju, možna skazać, hramadstva novymi ludźmi.
— Ci padabajecca tabie być kurjeram embryjonaŭ?
— Praca mnie padabajecca, ale ja razumieju, što ź ciaham času daviadziecca šukać štości bolš ziamnoje i pierśpiektyŭnaje.
Ciapier čytajuć
Dziaržaŭnyja kanały niečakana pakazali, jak vyhladajuć rezidencyi Łukašenki znutry. Raniej kamiery tudy nie traplali6
Kamientary