Mierkiel śpiašałasia, kab urad pačaŭ dziejničać da 20-hodździa padzieńnia Bierlinskaha muru. Piša ŭ svaim błohu na NN Alaksandr Kłaskoŭski.
U Hiermanii abvieščana, što ŭrad narešcie sfarmavany. Amal što miesiac išli pieramovy pamiž partyjaj Anhieły Mierkiel i ŭčarašnimi apazicyjanierami sa SvDP, jakija paśpiachova vystupili na vieraśnioŭskich vybarach u bundestah. Pahadnieńnie padpisali ŭ noč na subotu, 24 kastryčnika.
Kanclerka, jakoj było harantavana kresła i ŭ novym kabiniecie, śpiašałasia, kab urad pačaŭ dziejničać da 20-hodździa padzieńnia Bierlinskaha muru — 9 listapada. I ŭ ich, bač, ščyrujuć da čyrvonaj daty :-).
Mierkiel i jaje CHDS/CHSS ź lohkaj dušoj skazali «aŭfviderzejn» byłym paplečnikam pa kaalicyi — sacyjał-demakratam, što na parłamienckich vybarach 27 vieraśnia pralacieli jak faniera nad Bierlinam. Ciapier SDPH apynajecca ŭ apazicyi.
Hetym hłamurnym dziejačam zaraz nie da śmiechu: apynulisia ŭ apazicyi. Zrešty, miasić dručkami ich nie buduć...
Z učarašnimi ž apazicyjanierami, a ciapier tryŭmfatarami — svabodnymi demakratami na čale z Hida Viestervele — kiroŭnyja kansiervatary musili pajści na surjoznyja kampramisy, pierš čym pašenciła narešcie padpisać kaalicyjnaje pahadnieńnie. Tak, narodu abiacana źnizić padatki pačynajučy ŭžo z 1 studzienia 2010 hoda. Chacia na fonie kryzisu, ź jakoha jašče doŭha vyłazić, taki šyroki žest nie zusim darečy.
Uvohule ŭradoŭcam jość nad čym pačuchać patylicu. Šmat prablem ź sistemaj adukacyi. Daloka nie ŭsie niemcy ŭ zachapleńni ad płanaŭ partyi Mierkiel nadać novy impuls atamnaj enierhietycy (u ich tam svaje Astraŭcy!). U narodzie niepapularnaja afhanskaja misija bundeśvieru.
Cikavy momant: vajskovaje viedamstva ŭznačalić były ministr ekanomiki, patomny arystakrat Karł-Teador cu Hutenbierh. U Jeŭropie dziela takoj pasady nie abaviazkova być hienierałam. U Ispanii letaś, pamiatajecie, ministarkaj abarony stała ciažarnaja kabieta.
Darečy, jašče adna sastupka elektaratu. U bundeśviery zaraz buduć słužyć terminovuju nie dzieviać miesiacaŭ, a tolki šeść. Karaciej, u ich Franak Viačorka ŭžo dembielnuŭsia b.
Zrazumieła, mnohija našy realii dla niemcaŭ prosta niejmaviernyja. Aŭtar hetych radkoŭ jakraz byŭ u Hiermanii na niadaŭnija vybary. U tamtejšym MUSie i adnym z vybarkamaŭ nie mahli daŭmiecca, pra jakija kvoty dla partyj ja vypytvaju.
Nijakich kvotaŭ dla apazicyi va ŭčastkovych kamisijach tam niama. Nabirajuć vałancioraŭ (pryčym partyjnaść nikoha nie cikavić: jakaja roźnica?). A kali takich niestaje, siadaje jaki-niebudź miascovy čynoŭnik. Što toj zmachluje, nichto i ŭjavić sabie nie moža. Dziela čaho? Usio adno ž šyła ź miecha vylezie, davodzili mnie nieprabivalna-surjoznyja niemcy.
Daterminova, jak i ŭ nas, hałasujuć mnohija (dachodzić da 20-25%). Ale tam treba piśmova źviartacca na hety kont, i tady tabie dašluć pakiet papieraŭ. Heta ŭžo dyscyplinuje. Nu i ličać hałasy daterminovych vybarščykaŭ (jak i astatnich) uzorna-prazrysta.
U ich tam i biez prazrystych skryniaŭ atrymlivajucca čamuści prazrystyja vybary.
Karaciej, u sensie falsifikacyj heta absalutna sterylnaja kraina. Pa-pieršaje, uvieś elektaralny miechanizm jak na dałoni, nazirać za padlikam moža faktyčna chto zachoča. Pa-druhoje, pracuje realnaja sistema strymak i procivahaŭ.
Mierkiel kab i zachacieła, nie zmahła b zadziejničać niejki administracyjny resurs: ruki karotkija!
Narešcie, pracuje ahulny ŭzrovień palityčnaj kultury, palityčnaj maralnaści, kali chočacie.
Navat partyju pirataŭ palicyja nie haniaje :)
I potym, kali pieraloty z ułady ŭ apazicyju i nazad — zvyčajnaja reč, to, apynuŭšysia naviersie, prosta nieabačliva plavać na tych, chto časova na nižejšaj prystupcy.
Kaniečnie ž, niekali ž i ŭ nas budzie narmalnaje palityčnaje žyćcio, hetakaja, viedajecie, jeŭrapiejskaja palitrucina. Kali apazicyjanier, adčychvościŭšy ŭrad z parłamienckaj trybuny, budzie ŭviečary pić doma čaj u chałacie dy pantoflach, a nie pradavać dryžyki na Akreścina.
(Dalej achvotnyja mohuć vykłaści stratehiju blickryhu suprać režymu. Vaš pakorlivy słuha, žadajučy źmien usimi fibrami, cudadziejnych stratehij nie bačyć. Chacia nie vyklučana, što ŭsio adbudziecca chutka. Saviecki Sajuz abrynuŭsia biez anijakaj apazicyi ŭ kłasičnym sensie.)
Pakul što vidavočna adno: anachraničnaja sistema, zbudavanaja Łukašenkam, budzie spakvala raspaŭzacca pad ciskam finansava-ekanamičnych čyńnikaŭ. Hałoŭnym voraham PPRB stanovicca mienavita ekanomika. Jaje niezajzdrosny stan (plus cisk Maskvy) zmušaje i da palityčnych sastupak Jeŭropie.
Prarekłamavanyja «revalucyjnyja źmieny» ŭ vybarčym zakanadaŭstvie, kaniečnie ž, na 90% imitacyja. Ale fakt toje, što ŭłada ŭžo sastupaje, pryčym litaralna nazaŭtra paśla hučnych demaršaŭ z demanstracyjaj niazłomnaści.
Darečy, pa adnoj ź viersij, Viestervele, jaki staŭ vice-kancleram i ministram zamiežnych spraŭ, moža abrać bolej pryncypovy kurs u dačynieńni jak da Maskvy, tak i da Minska. Ale heta nie fakt, skazaŭ mnie dniami adzin daśviedčany niemiec. Bo nastaŭnik i kumir Viestervele — stary Hienšer. Toj samy, što ładziŭ chaŭrusy jašče z savieckimi kiraŭnikami. I, miž inšym, zrabiŭ zahadkavy vizit u Minsk sioleta ŭ vieraśni.
Jahonaj taktykaj na pasadzie ministra zamiežnych spraŭ FRH było łaviravańnie. Tady niamieckija palityki navat stali ŭžyvać admysłovy termin ź niehatyŭnym adcieńniem — «hienšeryzm». Ale fakt toje, što mienavita za Hienšeram abrynuŭsia Bierlinski mur.
Jaho padzieńnie, zaŭvažcie, nie zrabiła ŭsich niemcaŭ bahatymi dy ščaślivymi. Šmat u kaho siońnia nie ejfaryja, a depresija.
Hetak ža naiŭna spadziavacca, što Biełaruś stanie ziamnym rajem paśla niejkaj etapnaj padziei — źmieny ŭłady, praryvu da demakratyi, navat ustupleńnia ŭ Jeŭraźviaz. Svaboda nasamreč dla mnohich ciažki kryž. I dla ŭsich — vyprabavańnie.
Fota aŭtara.
Ciapier čytajuć
«Dyk dadomu zabiary ałkaša abascanaha i vychodžvaj». Małady zahadčyk adździaleńnia balnicy nie strymlivaje siabie ŭ vyrazach u sacsietkach27
Kamientary