Prakuratura zaviała kryminalnuju spravu z-za niavypłaty padatkaŭ. Imavierna, havorka pra Tez Tour
Adbyłosia niekalki zatrymańniaŭ.
Prakuratura Minska kryminalnuju spravu pa fakcie ŭchileńnia ad vypłaty padatkaŭ na sumu zvyš 700 tysiač rubloŭ «arhanizacyjaj, jakaja ažyćciaŭlaje turahientskuju dziejnaść». Jak stała viadoma «Lusterku», havorka moža iści pra znajomaha mnohim papularnaha turapieratara Tez Tour.
U zajavie prakuratury havorycca, što ŭłaśniki i słužbovyja asoby nienazvanaj arhanizacyi skažali infarmacyju ab vynikach pracy «šlacham uklučeńnia ŭ łancužok «turahient — turapieratar» nieabhruntavanych pasrednikaŭ u vyhladzie padkantrolnych zamiežnych subjektaŭ haspadarańnia, jakija znachodziacca ŭ Respublicy Kipr i AAE».
Heta praciahvałasia, pavodle viedamstva, z 2013 pa 2023 hod. Śćviardžajecca, što za hety čas kampanija niedapłaciła bolš za 700 tysiač rubloŭ padatkaŭ. Ciapier pa hetym fakcie zaviedziena kryminalnaja sprava pa č. 2 art. 243 KK.
Adznačajecca, što słužbovyja asoby hetaj kampanii ŭžo amal całkam pakryli škodu i pakinuli Biełaruś jašče da zaviadzieńnia kryminalnaj spravy.
Havorka moža iści pra biełaruskaje pradstaŭnictva bujnoha turapieratara Tez Tour, piša «Lusterka». Jak stała viadoma raniej, u pačatku minułaha tydnia ŭ kampanii, vierahodna, adbylisia zatrymańni. Pra heta paviedamili niekalki nie źviazanych pamiž saboj krynic.
Jak śćviardžaŭ adzin z surazmoŭcaŭ, byli zatrymanyja dyrektar Ihar Andrejeŭ, jaho namieśnik Alaksiej Bazyloŭ, a taksama hałoŭnaja buchhałtarka Taćciana Hierasimovič. Jon taksama paviedamlaŭ, što kampanija vypłaciła hrošy, i dadavaŭ, što paśla hetaha častku ludziej adpuścili.
Jašče adzin čałaviek sa śfiery turyzmu raskazaŭ, što čuŭ pra zatrymańni ŭ Tez Tour u pačatku minułaha tydnia ad kaleh. Na kaniec sakavika, jak jamu paviedamili, kampanija ŭžo «ŭsio vyrašyła». Adnak upeŭnienaści ŭ stabilnaści situacyi, pavodle jaho słoŭ, u jaho znajomych nie było.
Na haračaj linii Tez Tour adkazali, što kampanija pracuje jak zvyčajna.
Žurnalisty taksama sprabavali źviazacca z hałoŭnaj buchhałtarkaj kampanii, ale ŭ kampanii adkazali, što jaje niama na miescy. Padobnym čynam skončylisia sproby źviazacca z dyrektaram firmy.
Ciapier čytajuć
Uvodziać adkaznaść za prapahandu homaseksualnaści, biaździetnaści, a taksama za niezakonnaje pradstaŭleńnie Biełarusi na mižnarodnaj arenie26
Kamientary