«Stymulavaŭ varožaść suajčyńnikaŭ da Radzimy». Abvinavačańnie Paŭłu Biełavusu rychtyk takoje, jak u stalinskija časy
Stvaralniku Symbal.by vystavili abvinavačańnie: «na praciahu dziesiaci hadoŭ vioŭ aktyŭnuju dziejnaść, nakiravanuju na źmienu dziaržaŭnaj ułady niekanstytucyjnym šlacham».
Jak paviedamiŭ načalnik upraŭleńnia Śledčaha kamiteta pa Minsku Siarhiej Pasko, u 2011 hodzie «abvinavačany dla pošuku adnadumcaŭ pačaŭ tranślavać patrebnuju jamu infarmacyju ŭ masy».
«Pad vyhladam kulturna-histaryčnaha raźvićcia ŭ roznych ahulnadastupnych sacyjalnych sietkach i na sajtach jon raspaŭsiudžvaŭ idei biełaruskaha nacyjanalizmu, metaj jakich źjaŭlałasia źmiena dziaržaŭnaj ułady ŭ Biełarusi. Abvinavačany zarehistravaŭsia ŭ jakaści indyvidualnaha pradprymalnika i zasnavaŭ tavarystva z abmiežavanaj adkaznaściu (krama pa anłajn— i afłajn-prodažy tavaraŭ), paśla čaho pačaŭ pravodzić roznyja masavyja mierapryjemstvy», — paviedamlajuć aficyjnyja ŚMI.
«Stvoranyja biznes-prajekty adkryli pradprymalniku novyja mahčymaści. Tak jak Biełaruś zaŭsiody znachodziłasia ŭ centry ŭvahi na palityčnaj arenie, chutka znajšlisia tyja, chto byŭ hatovy spansiravać raźvićcio jaho antydziaržaŭnaj dziejnaści. Fihurant padpisaŭ nie mienš za 12 dahavoraŭ z roznymi zamiežnymi pradstaŭnikami i kampanijami. Z tych časoŭ ekstremisckaja dziejnaść na terytoryi Biełarusi nabyvała novyja abaroty dziakujučy ŭlivańniam z-za miažy».
«Śledstvam ustanoŭlena, što abvinavačany ŭ intaresach zamiežnych arhanizacyj dla chutčejšaj źmieny dziaržaŭnaj ułady stymulavaŭ varožaść suajčyńnikaŭ u dačynieńni da Radzimy. Svaimi złačynnymi dziejańniami Pavieł Biełavus na praciahu dziesiaci hadoŭ staviŭ pad pahrozu źniešniuju i ŭnutranuju biaśpieku dziaržavy. Za heta jon atrymaŭ ad zamiežnych sponsaraŭ bolš za $150 tys., 50 tys. jeŭra i 40 tys. złotych».
Pa vynikach rasśledavańnia Biełavusu vystaŭlena abvinavačańnie pa nastupnych artykułach Kryminalnaha kodeksa:
— č. 1 art. 356 (zdrada dziaržavie);
— č. 1 art. 342 (arhanizacyja i padrychtoŭka dziejańniaŭ, jakija hruba parušajuć hramadski paradak);
— č. 3 art. 361 (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś);
— č. 1 art. 361-1 (kiraŭnictva ekstremisckim farmiravańniem).
Na majomaść abvinavačanaha nakładzieny aryšt na ahulnuju sumu bolš za Br50 tys. Da jaho z sankcyi prakurora prymieniena miera strymańnia ŭ vyhladzie zaklučeńnia pad vartu. Rasśledavańnie kryminalnaj spravy zavieršana, materyjały pieradadzienyja prakuroru dla nakiravańnia ŭ sud.
Pavieł Biełavus byŭ zatrymany 15 listapada 2021 hoda. Spačatku jamu davali administracyjnyja sutki, a potym była zaviedziena kryminalnaja sprava.
Stała viadomaja asoba rabočaha «Biełaruśkalija», jaki zahinuŭ pry abrušeńni hornaj parody1
Kamientary