Polskija ŚMI: Dźvie rakiety ŭpali na terytoryju Polščy, jość achviary
Pavodle paviedamleńniaŭ polskich ŚMI, padčas siońniašniaj masiravanaj rasijskaj ataki na Ukrainu dźvie rakiety ŭpali na terytoryi Polščy i zabili dvuch čałaviek. Premjer-ministr Polščy Matevuš Maraviecki sklikaŭ z hetaj nahody terminovuju naradu Rady nacyjanalnaj biaśpieki i abarony.
Polskaje Radio Zet paviedamlaje, što ŭ siale Pševodaŭ (Pieravodaŭ) pablizu ŭkrainskaj miažy ŭpali dźvie rakiety i trapili ŭ zierniesušyłki. Paviedamlajecca navat pra hibiel dvuch čałaviek. Na miesca zdareńnia prybyli pradstaŭniki palicyi, prakuratury i vojska.
U toj ža čas Radio Lublin paviedamiła inšuju viersiju. Incydent u Pševodavie, maŭlaŭ, adbyŭsia kala 15:40 na pierahruzačnych vahach, kudy zajazdžajuć traktary z hruzami. Hetuju infarmacyju radyjostancyi paćvierdzili ŭ miascovaj palicyi. Pavodle papiarednich vysnoŭ, traktar, jaki zajechaŭ na vahi, raptam vybuchnuŭ. Radyjo taksama paviedamlaje pra hibiel dvuch čałaviek.
Pševodaŭ (u biełaruskaj i ŭkrainskaj tradycyi — Pieravodaŭ) znachodzicca prykładna za 6 km ad polska-ŭkrainskaj miažy.
U Varšavie sklikana terminovaje pasiadžeńnie Rady nacyjanalnaj biaśpieki i abarony.
Kali infarmacyja pra rasijski rakietny ŭdar paćvierdzicca, heta moža mieć surjoznyja nastupstvy. Paviedamlajuć, što polskija VPS padniali ŭ pavietra źniščalniki z aeradroma Tamašaŭ-Lubielski.
Siońnia Rasija vypuściła pa ŭkrainskich haradach 85 rakiet, jany byli nakiravanyja ŭ abjekty hramadzianskaj infrastruktury. Pavodle manitorynhavaj hrupy «Biełaruski hajun», z terytoryi Biełarusi zapuskaŭ rakiet hetym razam nie fiksavałasia.
Aficyjnaj infarmacyi pra toje, što zdaryłasia, niama. Vybuchi mahli być vynikam padzieńnia jak samich rakiet, tak i ich reštak, źbitych ukrainskaj supraćpavietranaj abaronaj.
Ciapier čytajuć
U sacsietkach Chlastova apublikavałasia videa, zapisanaje na vypadak jaho zatrymańnia. Sam śpiavak na Akreścina19
Kamientary