«Ja havaryŭ Pucinu nie rabić hetaha, heta pahražaje strašnymi stratami biełaruska‑rasijskim adnosinam. Hety rubiec nie zarubcuješ».
Rašeńnie ab adklučeńni hazu Biełarusi ŭ 2004 hodzie pryniaŭ tahačasny prezident Uładzimir Pucin, zajaviŭ Alaksandr Łukašenka, adkazvajučy na pytańni rasijskich žurnalistaŭ 2 kastryčnika ŭ Minsku.
«Hetaje rašeńnie było pryniata tahačasnym prezidentam Pucinym», — skazaŭ jon, kamientujučy pavodle prośby žurnalistaŭ słovy byłoha premjer‑ministra Michaiła Kaśjanava ŭ jaho tolki što vydanaj knizie miemuaraŭ. Kaśjanaŭ, jaki ŭ 2004 hodzie zajmaŭ pasadu kiraŭnika ŭrada, admaŭlaje svajo dačynieńnie da adklučeńnia hazu.
«Kaśjanaŭ nie prymaŭ rašeńnie ab adklučeńni hazu Biełarusi, jon piša praŭdu. Bolš za toje — jon byŭ kateharyčna suprać takich padychodaŭ. Tamu što jon viedaŭ, što ekanamičnyja nastupstvy, asabliva imidžavyja, pamiž krainami buduć sapsavany, a raschlobvać heta daviadziecca ŭradam dźviuch krain», — dadaŭ Łukašenka.
Łukašenka nahadaŭ, što ŭ kancy 2005 hoda išła sprečka ab padpisańni kantrakta: «Razmova išła ab pavyšeńni cany ŭ dva razy, i ja prasiŭ hetaha nie rabić». «Pa‑pieršaje, my prosta nie vytrymajem hetaha pavyšeńnia. Pa‑druhoje, ja matyvavaŭ svaju prośbu tym, što kali ŭ nas dla spažyŭcoŭ pryrodny haz budzie ŭ try razy daražejšy, čym u Rasii, my nie zmožam kankuravać na rasijskim rynku», — rastłumačyŭ Łukašenka.
Pavodle jaho słoŭ, pavyšeńnie cen na haz pryviało b da pavieličeńnia sabiekoštu biełaruskaj pradukcyi ŭ paŭtara razu. U takich umovach Biełaruś nie mahła zarabić hrošy, kab raspłačvacca za pryrodny haz i naftu. Pavodle raźlikaŭ, hadavyja straty dachodzili da 5 młrd. dołaraŭ.
«Ja havaryŭ Pucinu nie rabić hetaha, heta pahražaje strašnymi stratami biełaruska‑rasijskim adnosinam. Hety rubiec nie zarubcuješ. Ale haz usio roŭna byŭ pierakryty», — zajaviŭ Łukašenka.
Pavodle jaho słoŭ, u adkaz na dziejańni Maskvy Biełaruś pryniała rašeńnie pavialičyć košt tranzitu pryrodnaha hazu z Rasii pa svajoj terytoryi. Adnak, kali ŭ Rasii pierakanalisia, što nie tolki Biełaruś, ale i sama Rasija hublaje na štrafnych sankcyjach z boku jeŭrapiejskich spažyŭcoŭ, Pucin patelefanavaŭ, kab urehulavać roznahałośsi, skazaŭ Łukašenka. «Biełaruś adkryła ŭsie kanały pastavak enierharesursaŭ na Zachad. Nu, i što my ŭ vyniku atrymali?» — zadaŭsia pytańniem prezident.
Kažučy pra ciapierašnija adnosiny dźviuch krain u enierhietyčnaj śfiery, Łukašenka zajaviŭ, što Biełaruś prapanuje Rasii vyhadnyja ŭmovy tranzitu nafty i hazu. Adnak Rasija, pavodle jaho słoŭ, ihnaruje hetyja ŭmovy.
Razam z tym, adznačyŭ Łukašenka, u vypadku tranzitu nafty ŭ abchod Biełarusi Rasija stracić na kožnaj tonie 24 dołary. U Jeŭropie, pavodle jaho słoŭ, košt tranzitu składaje 1,3 dołara za 1 tonu na 100 km, u Biełarusi — 0,81 dołara. «Navošta vam heta? Hrošy niama kudy padzieć?» — źviarnuŭsia prezident da rasijskaha boku.
Kamientary