«U tym liku šlacham užyvańnia vajennaj siły». Minsk pahražaje Ukrainie, Polščy i Litvie kompleksam «previentyŭnych mier stratehičnaha strymlivańnia»
Minabarony sabrała zamiežnych ataše, akredytavanych u Biełarusi. Im była začytanaja aficyjnaja zajava, vytrymanaja ŭ ahresiŭnym tonie, jakaja idzie ŭrazrez z raniejšymi dekłaracyjami, što Biełaruś ustupić u vajnu tolki ŭ vypadku napadu na jaje terytoryju.
«Respublika Biełaruś budzie adstojvać svaje nacyjanalnyja intaresy z vykarystańniem usich najaŭnych srodkaŭ, u tym liku šlacham užyvańnia vajennaj siły, i pakidaje za saboj prava prymianieńnia kompleksu previentyŭnych mier stratehičnaha strymlivańnia ŭ metach niedapuščeńnia napadu abo niejtralizacyi ŭnutranaha ŭzbrojenaha kanfliktu, — začytaŭ zajavu Ministerstva abarony pałkoŭnik Valeryj Ravienka, kiraŭnik departamienta mižnarodnaj vajkovaj supracy — pamočnik ministra abarony. —
Takim čynam, u jakaści reakcyi na składanuju abstanoŭku ŭ jakaści kompleksu mier stratehičnaha strymlivańnia pa niedapuščeńni destabilizacyi situacyi i raźviazvańnia vajennaj ahresii suprać Respubliki Biełaruś i «Sajuznaj dziaržavy» ŭ cełym i na hruncie punktu 11 vajennaj daktryny «Sajuznaj dziaržavy» … kiraŭnikami Biełarusi i Rasii było pryniataje rašeńnie pra razhortvańnie kampanientaŭ rehijanalnaj hrupoŭki vojskaŭ», — zajaviŭ pradstaŭnik Minabarony.
«Ahulnaja kolkaść da prybyćcia ŭ RB składzie da 9000 asabovaha składu, kala 170 tankaŭ, da 200 bajavych braniravanych mašyny i da 100 harmat i minamiotaŭ kalibram bolš za 100 mm», — adznačyŭ Ravienka.
Ciažka skazać, ci hetyja źviestki praŭdzivyja. Uzimku 2022 hoda pierad napadam Rasii na Ukrainu biełaruskija siłaviki raspaŭsiudžvali chłuślivyja źviestki adnosna kolkaści rasijskaha kantynhientu i taksama śćviardžali, što rasijskija častki prybyli ŭ Biełaruś vyklučna dziela vučeńniaŭ.
Pamočnik ministra abarony dadaŭ, što rašeńnie ab razhortvańni RHV «pryniata i realizujecca vyklučna dla ŭzmacnieńnia abarony miežaŭ Sajuznaj dziaržavy».
«U jakaści pahroz biaśpieki Sajuznaj dziaržavy razhladajucca razhortvańnie hrupoŭki NATA pablizu miežaŭ na fonie adsutnaści dyjałohu, pavyšeńnie intensiŭnaści mierapryjemstvaŭ padrychtoŭki NATA z nastupalnaj tematykaj, zaachvočvańnie biełaruskich radykalnych elemientaŭ dla źviaržeńnia zakonnaj ułady ŭ Biełarusi», — rastłumačyŭ jon.
Za minuły miesiac pierakidvańnia rasijskaj techniki ŭ Biełaruś nie fiksavałasia. Naadvarot, žychary biełaruskich haradoŭ adznačyli pieramiaščeńnie ŭ Rasiju niekalkich ešałonaŭ sa starymi tankami i «Urałami». Čyhunačniki, jakija padtrymlivajuć antyłukašenkaŭskaje padpolle, zdabyli dakumienty, jakija śviedčać, što techniku pierakidvajuć sa składoŭ zachoŭvańnia pad Lubańniu na Danbas.
Zajava Minabarony pra mahčymych «previentyŭnych mier» idzie ŭrazrez z raniejšymi zajavami minskaj administracyi. Raniej Alaksandr Łukašenka, a za im i hienierały publična dekłaravali, što Biełaruś ustupić u vajnu tolki ŭ vypadku napadu na jaje terytoryju. Adnačasova prapahanda prahramuje siłavikoŭ i nasielnictva, što taki napad z boku Ukrainy, maŭlaŭ, abaviazkova adbudziecca, bo da hetaha nibyta ŭłady Ukrainy padšturchoŭvaje Zachad.
«Vymušanyja kanstatavać, što biesprecedentnaje hieapalityčnaje prociborstva miž tak zvanym «kalektyŭnym Zachadam» i Rasijskaj Fiederacyjaj vyjšła na novy ŭzrovień i adbivajecca na ŭsim praciahu miežaŭ Respubliki Biełaruś», — zajaviŭ vajskovym ataše pamočnik ministra abarony.
«Adkryta hučyć i tyražujecca vajaŭničaja rytoryka aficyjnych asob i praŭładnych analitykaŭ šerahu zamiežnych dziaržaŭ, u tym liku i našych susiedziaŭ», — «My vyrazna bačym praktyčnyja dziejańni krain Paŭnočnaatłantyčnaha aljansu, nakiravanyja na dalejšaje pašyreńnie kanfliktu va Ukrainie šlacham pastavak uzbrajeńnia i techniki, zdolnych pieratvaryć dadzieny kanflikt u hłabalny», — zajaviła Minabarony.
«Budučy stratehičnym sajuźnikam Rasijskaj Fiederacyi, my taksama ŭciahnutyja ŭ śpiecyjalnuju vajennuju apieracyju», — zajaviŭ pradstaŭnik Minabarony. «Adnak asnoŭnaja zadača, jakaja vykonvajecca biełaruskimi Uzbrojenymi siłami, heta zabieśpiačeńnie biaśpieki miežaŭ Sajuznaj dziaržavy», — apraŭdvaŭsia jon.
Pałkoŭnik Ravienka, jak i inšyja biełaruskija aficyjnyja asoby, nie asudziŭ Rasiju za ahresiju suprać suvierennaj Ukrainy i sprobu rasčlanić jaje.
U toj ža čas pradstaŭnik Minabarony vykazaŭ pretenzii Polščy i Litvie za padtrymku ruchu za svabodnyja vybary ŭ Biełarusi i Abjadnanaha pierachodnaha kabinieta. Pry hetym jon vystupiŭ z zaviedama chłuślivymi śćviardžeńniami adnosna vynikaŭ i nastupstvaŭ vybaraŭ 2020 hoda i metaŭ dziejnaści biełaruskaj apazicyi.
Pałkoŭnik Ravienka vyhladaŭ blednym i havaryŭ z chvalavańniem u hołasie.
Kamientary