Biełaruskaja fiederacyja futboła, jakaja vałodaje kantrolnym pakietam akcyj spartyŭnaj haziety «Presboł», razryvaje kantrakt z karespandentam Andrejem Iljeniem. Raniej žurnalist byŭ pakarany administracyjnym aryštam za «pikietavańnie ŭ sacsietkach».
Futbolnaha ahladalnika «Presboła», kamientatara matčaŭ čempijanatu Biełarusi na telekanale «JASNAie TV» Andreja Iljeniu siłaviki zatrymali 14 vieraśnia, sud pakaraŭ jaho 10 sutkami źniavoleńnia.
Jak kažuć kalehi Andreja Iljeni, pad «začystku» toj trapiŭ zbolšaha vypadkova. U liku inšych byŭ akredytavany ŭ skład aficyjnaj delehacyi na vyjaznyja matčy nacyjanalnaj zbornaj u navastvoranaj Lizie Nacyj pad ehidaj UEFA. A z ulikam taho, što ciapier ad supracoŭnikaŭ ŚMI patrabujecca jašče i poŭnaja łajalnaść, ideołahi pravieryli sacsietki na najaŭnaść kramoły. I vielmi chutka znajšli «istotnyja parušeńni dziejnaha zakanadaŭstva».
Akazałasia, što Andrej Iljenia na avatarcy ŭ Facebook źmiaściŭ bieła-čyrvona-bieły ściah (ciapier sacsietki tatalna «sterylizavanyja»). Ułasna kažučy, za «virtualnaje pikietavańnie» i zatrymali. U vyniku zamiest kamandzirovak u Kazachstan i Sierbiju žurnalist vypraviŭsia na 10 sutak na Akreścina.
Vyhladaje, što jašče adnym razdražnialnikam dla kantraloraŭ stała i pracoŭnaja mova Andreja Iljeni — jon pryncypova kamientuje teletranślacyi na biełaruskaj movie, na joj ža vioŭ zapisy ŭ svaich akaŭntach.
Pakolki ciapierašni «Presboł» całkam padkantrolny Biełaruskaj fiederacyi futboła, kiraŭnictva jakoj uchvalaje ŭsie kadravyja ratacyi, skasavańnie kantrakta ź niełajalnym žurnalistam było vyznačanaje praktyčna ŭ momant jaho zatrymańnia.
Jak raspavioŭ karespandentu słužby manitoryhu BAŽ adzin ź dziejnych supracoŭnikaŭ spartyŭnaha vydańnia, Andreju Iljeniu «pašancavała» ŭžo ŭ tym, što vyjšaŭ biez fors-mažoru paśla 10 sutak. Adnak dalej spadziavacca niama na što — «chutka zvolniać». Kiraŭnik asacyjacyi, adstaŭny vajskoviec Uładzimir Bazanaŭ demanstruje poŭnuju salidarnaść ź dziejnym palityčnym režymam i nie tryvaje navat minimalnych prajavaŭ apazicyjnaści.
Admietna, što ŭ «Priessboł» Andreja Iljeniu pryciahnuli jak ekstrannuju «zatyčku ŭ praboinie». Paśla hvałtoŭnaha pryznačeńnia ŭłaśnikam — biez papiaredniaha abmierkavańnia z kalektyvam — na pasadu hałoŭnaha redaktara haziety eks-kamientatara telekanała ANT Siarhieja Lisičkina, viadučyja žurnalisty ŭčynili demarš i salidarna pakinuli redakcyju. Na vakantnyja miescy daviałosia šukać «štrejkbrechieraŭ». U hetym pieraliku akazaŭsia i Andrej Iljenia.
Da taho jon pracavaŭ u dziaržaŭnaj «Spartyŭnaj panaramie», a taksama vykonvaŭ funkcyi pres-sakratara mužčynskaj i žanočaj kamandaŭ nacyjanalnaha pieršynstva — «Dniepr» i «Nadzieja-Dniepr» adpaviedna.
Adnosna novaha pracaŭładkavańnia Andrej Iljenia prahnazavać pakul ničoha nie biarecca.
Ciapier čytajuć
«Na kancertach niama miesca radykalnamu nacyjanalizmu, ahresii i hvałtu». Maks Korž vykazaŭsia nakont skandału, jaki razhareŭsia paśla jaho vystupu ŭ Varšavie3434
«Na kancertach niama miesca radykalnamu nacyjanalizmu, ahresii i hvałtu». Maks Korž vykazaŭsia nakont skandału, jaki razhareŭsia paśla jaho vystupu ŭ Varšavie34
Biełaruska arhanizavała adpačynak dla dziaciej palitviaźniaŭ na Łazurnym bierazie. Jana raskazała, jak uciakała z krainy i jak jaje zatrymlivaŭ Interpał1414
Kamientary