«Jana pradała svajho baćku, siamju, Radzimu». Dačka rasijskaha sienatara vystupiła suprać vajny, baćka ad jaje adchryściŭsia
U krasaviku 2022 hoda 25-hadovaja Dzijana Isakava, starejšaja dačka sienatara ad Chanty-Mansijskaj aŭtanomnaj akruhi Eduarda Isakava, vyjšła na antyvajennuju akcyju ŭ Sočy. Jaje praktyčna adrazu zatrymali. Nieŭzabavie pra heta daviedaŭsia sienatar Isakaŭ i, jak śćviardžaje jahonaja dačka, vyhnaŭ jaje z domu. Ciapier Dyjana znachodzicca nie ŭ Rasii, ale pierad tym, jak źjechać z krainy, jana dała vialikaje intervju «Mieduzie».
Daviedaŭšysia pra heta intervju, dadzienaje «ŚMI, pryznanamu inšaahientam», jak baćka nieadkładna napisaŭ post u telehramie, u jakim amal u stylistycy stalinskich časoŭ adchryściŭsia ad rodnaj dački.
«Mabyć, jana atrymała hrašovyja srodki ad hetych ŚMI, inšymi słovami — pradała svajho baćku, siamju, Radzimu i pakinuła Rasiju. Składana padabrać słovy, kali tvaja dačka akazvajecca zdradnikam», — napisaŭ sienatar.
Kali ŭ krasaviku Dyjana Isakava ŭpieršyniu publična vystupiła suprać vajny, baćka, pa jahonych słovach, «sprabavaŭ rastłumačyć joj nieabchodnaść praviadzieńnia SVA, prapanoŭvaŭ naviedać miescy bajavoj słavy savieckaha naroda, pačytać pra historyju svajoj krainy. Prapanoŭvaŭ pajechać na Danbas u jakaści vałanciora, dapamahać ludziam, jakija vosiem hadoŭ žyli ŭ stanie vajny, i ź pieršych vusnaŭ daviedacca pryčyny SVA». Ale dačku ŭsio heta nie spakusiła: jana, maŭlaŭ, «choča tolki chajpanuć na takoj surjoznaj temie, tamu i źviarnułasia ŭ ŚMI, raskazaŭšy pra svaju pazicyju, nie zabyŭšysia zhadać, što jana — dačka sienatara».
Paśla taho baćka vykładaje «kampramat» na 25-hadovuju Dyjanu, jakuju, jak sam pryznajecca, nie vychoŭvaŭ z troch hadoŭ, bo jana dačka ad pieršaha šlubu. Pavodle jaho, jana staić na psichanieŭrałahičnym uliku, rabiła sproby suicydu, naležała da ŁHBT, nie maje adukacyi, bo nie chacieła vučycca, ni dnia nie pracavała.
«Z taho momantu, jak ja daviedaŭsia, što ŭ jaje antyrasijskaja pazicyja, my nie majem znosin. Ja jaje nie zabiaśpiečvaju, nie daju žylla.
Dumaŭ, što pojdzie pracavać, pačnie darosłaje žyćcio, budzie dumać pa-darosłamu.
A jana vyrašyła zarabić hrošy, pradaŭšy svajo intervju, pradstaviŭšysia dačkoj sienatara».
Ciapier čytajuć
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj12
Kamientary