«Яна прадала свайго бацьку, сям'ю, Радзіму». Дачка расійскага сенатара выступіла супраць вайны, бацька ад яе адхрысціўся
У красавіку 2022 года 25-гадовая Дзіяна Ісакава, старэйшая дачка сенатара ад Ханты-Мансійскай аўтаномнай акругі Эдуарда Ісакава, выйшла на антываенную акцыю ў Сочы. Яе практычна адразу затрымалі. Неўзабаве пра гэта даведаўся сенатар Ісакаў і, як сцвярджае ягоная дачка, выгнаў яе з дому. Цяпер Дыяна знаходзіцца не ў Расіі, але перад тым, як з'ехаць з краіны, яна дала вялікае інтэрв'ю «Медузе».
Даведаўшыся пра гэта інтэрв'ю, дадзенае «СМІ, прызнанаму іншаагентам», як бацька неадкладна напісаў пост у тэлеграме, у якім амаль у стылістыцы сталінскіх часоў адхрысціўся ад роднай дачкі.
«Мабыць, яна атрымала грашовыя сродкі ад гэтых СМІ, іншымі словамі — прадала свайго бацьку, сям'ю, Радзіму і пакінула Расію. Складана падабраць словы, калі твая дачка аказваецца здраднікам», — напісаў сенатар.
Калі ў красавіку Дыяна Ісакава ўпершыню публічна выступіла супраць вайны, бацька, па ягоных словах, «спрабаваў растлумачыць ёй неабходнасць правядзення СВА, прапаноўваў наведаць месцы баявой славы савецкага народа, пачытаць пра гісторыю сваёй краіны. Прапаноўваў паехаць на Данбас у якасці валанцёра, дапамагаць людзям, якія восем гадоў жылі ў стане вайны, і з першых вуснаў даведацца прычыны СВА». Але дачку ўсё гэта не спакусіла: яна, маўляў, «хоча толькі хайпануць на такой сур'ёзнай тэме, таму і звярнулася ў СМІ, расказаўшы пра сваю пазіцыю, не забыўшыся згадаць, што яна — дачка сенатара».
Пасля таго бацька выкладае «кампрамат» на 25-гадовую Дыяну, якую, як сам прызнаецца, не выхоўваў з трох гадоў, бо яна дачка ад першага шлюбу. Паводле яго, яна стаіць на псіханеўралагічным уліку, рабіла спробы суіцыду, належала да ЛГБТ, не мае адукацыі, бо не хацела вучыцца, ні дня не працавала.
«З таго моманту, як я даведаўся, што ў яе антырасійская пазіцыя, мы не маем зносін. Я яе не забяспечваю, не даю жылля.
Думаў, што пойдзе працаваць, пачне дарослае жыццё, будзе думаць па-даросламу.
А яна вырашыла зарабіць грошы, прадаўшы сваё інтэрв'ю, прадставіўшыся дачкой сенатара».
Цяпер чытаюць
Усе чакалі падзення цэн, але нічога падобнага! Як за год змяніліся цэны на кватэры ў Мінску і іншых буйных гарадах8
Каментары