Rasiju achapiŭ masavy posttraŭmatyčny sindrom: u aptekach uźlacieli ceny na abiazbolvalnyja i trankvilizatary
Rasiju niby achapiŭ masavy posttraŭmatyčny sindrom: tysiačy čałaviek pabyvali na vajnie, a miljony štodnia nazirajuć za joj na ekranach televizaraŭ i hadžetaŭ. Cana abiazbolvalnych i zaspakajalnych preparataŭ rezka vyrasła ŭ červieni i rekordna pavysiła indeks cen na leki za ŭvieś čas nazirańniaŭ, paviedamlaje The Moscow Times.
Pavodle padlikaŭ, spažyviecki košyk siaredniaha naviedvalnika aptek padaražeŭ na 2,3% za miesiac i bolš čym na 20% z pačatku hoda.
«U hetym miesiacy my nazirajem istotny rost cenaŭ na leki. Pry hetym dynamika cen u hetaj katehoryi nie kareluje ź inšymi praduktami. Asnoŭnymi drajvierami rostu vystupili abiazbolvalnyja i zaspakajalnyja srodki», — adznačaje dyrektar biźnies-napramku «M-Romir» Ksienija Pajzanskaja.
Rasijskim hramadzianam patrabujecca ŭsio bolš analhietykaŭ, anksijalitykaŭ i trankvilizataraŭ pa miery taho, jak u hramadstvie narastaje ŭzrovień psichitazacyi. Červieńskaje apytańnie prajekta «Chronika» pakazała: na fonie vajny i isteryčnaści dziaržprapahandy kožny čaćviorty (25,7%) pierastaŭ razmaŭlać ź blizkimi siabrami abo svajakami, a ŭ 43% zdaralisia prystupy tryvohi abo depresii (na 10% bolš, čym u mai).
Śledam za zaspakajalnymi ludzi skuplajuć antydepresanty ź siaredniaj chutkaściu miljon upakovak za miesiac: popyt na ich pa vynikach pieršaha paŭhodździa padskočyŭ na 66%, padličyli ŭ Centry raźvićcia pierśpiektyŭnych technałohij (RCPR).
Epicentram depresij, kali vieryć prodažam u aptekach, stała Maskva, dzie antydepresanty pradajucca ŭ abjomie 1,3 tysiačy upakovak na 10 tysiač čałaviek nasielnictva. Dalej iduć Sankt-Pieciarburh (1,2 tysiačy) i Maskoŭskaja vobłaść (1,1 tysiačy).
Siaredni košt antydepresantaŭ, jak vynikaje sa źviestak CRPT, vyras za hod amal na 30%. Heta ŭtraja vyšej za aficyjnuju inflacyju na rynku lekaŭ, jakuju Rasstat aceńvaje ŭ 10,3% (pa stanie na 1 žniŭnia).
Kamientary