«Vyvieli ŭ kajdankach». Jak zatrymlivali hiendyrektara ptuškafabryki «Družba» Vasila Markieviča
Učora źjaviłasia infarmacyja pra zatrymańnie i zvalnieńnie hiendyrektara ptuškafabryki «Družba» ŭ Baranavickim rajonie Vasila Markieviča. Intex-press.by pasprabavaŭ daviedacca padrabiaznaści.
«U piatnicu, 29 lipienia, dniom byli zatrymanyja siłavikami hiendyrektar ptuškafabryki «Družba» i hałoŭny buchhałtar, — raspavioŭ adzin z čytačoŭ. — Dyrektar źjaŭlaŭsia deputatam Savieta Respubliki, ale, jak vidać, heta jaho nie vyratavała».
«Pryjšli ludzi ŭ bałakłavach, prosta ŭ kabiniecie nadzieli kajdanki i vyvieli», — paviedamiŭ paźniej jašče adzin čałaviek, a druhi, rabotnik pradpryjemstva, skazaŭ, što Markieviča «niby zatrymali za chabar».
Z sajta ptuškafabryki infarmacyja pra Vasila Markieviča źnikła. U śpisie kiraŭnictva naohuł niama pasady «hiendyrektar», adrazu ŭkazany pieršy namieśnik hiendyrektara Valeryj Samuščyk, jaki dziejničaje «na padstavie Statuta i pratakoła pasiadžeńnia naziralnaha savieta № 11 ad 29.07.2022».
Intex-press taksama źviazaŭsia z Valeryjem Samuščykam, kab daviedacca, kudy padzieŭsia Vasil Markievič i ci praŭda, što jaho zatrymali.
— Ja nie budu ničoha kamientavać. Ja vydatna viedaju, što vy chočacie pačuć ad mianie. Ci vy dumajecie, ja ŭ zamknionaj prastory žyvu? — zajaviŭ Valeryj Samuščyk i pakłaŭ słuchaŭku.
Nijakaj aficyjnaj infarmacyi nakont zatrymańnia hiendyrektara ptuškafabryki «Družba» ni na sajcie Śledčaha kamiteta, ni na sajtach inšych siłavych struktur na hety momant niama. Adnak krynica Intex-press u orhanach paćvierdziła fakt jaho zatrymańnia.
Viadoma, što ŭčora Vasil Markievič adkazaŭ na zvanok, ale adrazu pakłaŭ słuchaŭku, tamu, u jakim statusie jon znachodzicca, nieviadoma. Učora pra jaho mahčymaje zatrymańnie paviedamiła «Zierkało» sa spasyłkaj na svaje krynicy.
Ciapier čytajuć
Biełaruska arhanizavała adpačynak dla dziaciej palitviaźniaŭ na Łazurnym bierazie. Jana raskazała, jak uciakała z krainy i jak jaje zatrymlivaŭ Interpał5
Kamientary