Jeŭrakamisija dazvoliła tranzit padsankcyjnych tavaraŭ u Kalininhrad
Jeŭrakamisija 13 lipienia pryniaćciem novych pravił dazvoliła Rasii pieravozić padsankcyjnyja tavary pa čyhuncy ŭ Kalininhradskuju vobłaść i ź jaje praz terytoryju Jeŭrapiejskaha sajuza, ale tolki dla patreb hetaha ekskłava, piša Delfi.
«Hetyja kirujučyja pryncypy paćviardžajuć, što aŭtamabilny tranzit padsankcyjnych tavaraŭ rasijskimi kampanijami nie dazvoleny ŭ adpaviednaści z abmiežavalnymi mierami JEZ. Na čyhunačnym transparcie takoj zabarony niama, kali nie budzie pieraškod dla abaviazacielstvaŭ dziaržaŭ — členaŭ ES ažyćciaŭlać efiektyŭny kantrol», — havorycca ŭ pres-relizie Jeŭrakamisii.
Tranzit niekatorych rasijskich tavaraŭ u Kalininhrad spyniŭsia paśla ŭvachodžańnia ŭ dziejańnie sankcyj ES, abvieščanych u suviazi z uvarvańniem Maskvy va Ukrainu.
Pavodle abnoŭlenych pravił, Litva i inšyja krainy — členy ES pavinny buduć praviarać, ci zastajucca abjomy tranzitu ŭ miežach abjomaŭ, ustanoŭlenych za apošnija try hady, kab zabiaśpiečyć, što padpadajuć pad sankcyi tavary, jakija pieravoziacca ŭ Kalininhrad, ci adpaviadajuć jany realnamu miascovamu popytu i ci nie ekspartujucca ŭ krainy ES.
Dziaržavy-udzielnicy taksama pavinny buduć adsočvać niezvyčajnyja patoki tavaraŭ abo handlovyja tendencyi, jakija mohuć spryjać abychodu sankcyj.
Niahledziačy na abnoŭlenyja praviły, tranzit tavaraŭ i technałohij vajskovaha abo padvojnaha pryznačeńnia zastajecca zabaronienym, niezaležna ad abranaha sposabu transparciroŭki.
«Meta siońniašniaj darožnaj karty — rastłumačyć praviły, jakija prymianiajucca, i nahadać, što dziaržavy — členy ES pavinny praduchilać usie mahčymyja formy abychodu abmiežavalnych mieraŭ ES. Tamu Jeŭrakamisija padkreślivaje važnaść manitorynhu handlovych płyniaŭ u abodvuch napramkach pamiž Rasijaj i Kalininhradskaj vobłaściu, kab harantavać, što padsankcyjnyja tavary nie patrapiać na mytnuju terytoryju ES», — havorycca ŭ paviedamleńni.
Litoŭskija ŭłady vystupali ŭvieś hety čas suprać taho, kab iści na niejkija sastupki Rasii.
Čytajcie taksama:
Rasijskija krynicy: ES vyklučyć z sankcyj hruzy ŭ Kalininhrad
Litva pra pahrozy Rasii: My pryvykli da ich mietadaŭ pracy
Prezident Litvy ab sankcyjach u dačynieńni da kalininhradskaha tranzitu: Pra sastupki Rasii nie moža być i havorki
Ciapier čytajuć
«Kibierpartyzanaŭ» krytykujuć za ŭzłom sajta Nacbiblijateki — bo ciapier nie pracuje katałoh. Tyja adkazali20
Kamientary