Prezident Litvy ab sankcyjach u dačynieńni da kalininhradskaha tranzitu: Pra sastupki Rasii nie moža być i havorki
Urad Litvy pavinien nieadkładna pačać kansultacyi ź Jeŭrapiejskaj kamisijaj pa realizacyi sankcyj u dačynieńni da Kalininhradskaha tranzitu, ličyć prezident Litvy Hitanas Naŭsieda.
«Urad pavinien nieadkładna pačać kansultacyi ź Jeŭrakamisijaj, kab uviedzienyja sankcyi nie nanieśli škody ni intaresam Litvy, ni mižnarodnym pahadnieńniam. Tolki sumiesnymi namahańniami my damožamsia taho, kab sankcyi ŭ dačynieńni da krainy-ahresara byli balučymi», — napisaŭ u Facebook Naŭsieda, jaki viarnuŭsia z pasiadžeńnia Jeŭrapiejskaj rady ŭ Bruseli.
Jon zajaviŭ, što ŭ čaćvier abmierkavaŭ pytańnie tranzitu z staršynioj Jeŭrakamisii Ursułaj fon der Lajen i adznačyŭ, što Litva nie pojdzie na sastupki Rasii.
«Całkam jasna, što Litva pavinna i budzie prymianiać sankcyi ES. Litva pavinna i budzie zachoŭvać kantrol nad tavarami, jakija pravoziacca praź jaje terytoryju, i ni pra jakija kalidory nie moža być i havorki, jak nie moža być i havorki pra sastupki Rasii ŭ adkaz na pahrozy Kramla», — adznačaje Nausieda.
Paśla ŭstupleńnia ŭ siłu na minułym tydni sankcyj Jeŭrapiejskaha sajuza Litva abmiežavała tranzit stali i čornych mietałaŭ u Kalininhrad, spasyłajučysia na rastłumačeńnie ES.
Maskva zajaviła, što tranzitnyja abmiežavańni parušajuć mižnarodnyja pahadnieńni, i pryhraziła, što za hetym budzie reakcyja. Litoŭskija aficyjnyja asoby zajaŭlajuć, što Rasija nieabhruntavana abvinavačvaje krainu ŭ tranzitnych abmiežavańniach — na samaj spravie Vilnius prosta vykonvaje sankcyi ES.
Ciapier čytajuć
Čamu YouTube vydaliŭ kanały BiełTA, STB i ANT? Voś što viadoma14
Kamientary