Rasijski «AŭtaVAZ» prypynić vytvorčaść paśla padzieńnia prodažaŭ svaich mašyn Lada
Rasijski aŭtavytvorca AŭtaVAZ płanuje časova spynić vytvorčaść hetaj viasnoj. Supracoŭnikaŭ adpraviać u karparatyŭny adpačynak z 4 da 13 maja, a z ulikam tradycyjnych u Rasii vialikich vychadnych kanviejer faktyčna spynicca ŭžo z 2 maja, piša The Moscow Times.
Aficyjna kampanija tłumačyć spynieńnie vypusku pradukcyi madernizacyjaj vytvorčaści i padrychtoŭkaj da vypusku novaj madeli — krasoviera Lada Azimut. Taksama buduć pravodzicca raboty na linii, dzie vypuskajuć pazadarožnik Lada Niva.
Adnak dylery śćviardžajuć, što sapraŭdnaja pryčyna — nizki popyt i pierapoŭnienyja składy. Pavodle peŭnych źviestak, prastoj moža praciahnucca navat da siaredziny maja. Takim čynam kampanija sprabuje paźbiehnuć pierachodu na skaročany pracoŭny tydzień, jak heta ŭžo zrabiŭ KamAZ praz padzieńnie prodažaŭ.
Choć u sakaviku aŭtarynak u Rasii krychu ažyviŭsia, marka Lada pakazała słabiejšyja vyniki za inšych. Jaje prodažy amal nie vyraśli ŭ paraŭnańni ź minułym hodam, a za pieršy kvartał navat źnizilisia. U toj ža čas kankurenty, asabliva kitajskija brendy, značna naroščvajuć prodažy.
Ekśpierty adznačajuć, što popyt u sakaviku častkova vyras z-za rańniaj viasny i žadańnia pakupnikoŭ paśpieć kupić aŭto pa starych cenach. Ale ŭ cełym prahnozy strymanyja — čakajecca, što ŭ nastupnyja miesiacy rynak znoŭ asłabnie.
Asnoŭnaja prablema «AŭtaVAZa» ŭ tym, što jahonyja novyja madeli stanoviacca daražejšymi i ŭžo kankurujuć z bolš sučasnymi kitajskimi aŭtamabilami. U vyniku častka pakupnikoŭ addaje pieravahu albo zamiežnym brendam, albo patrymanym aŭto.
Niahledziačy na toje, što dola aŭtamabilaŭ rasijskaj zborki na rasijskim rynku istotna vyrasła, asnoŭnuju vyhadu ad hetaha atrymlivajuć nie madeli Lada, a inšyja vytvorcy.
Kamientary