Mikałaja Statkieviča etapavali ŭ kałoniju ŭ Hłybokim — najbolš biesčałaviečnuju ŭ Biełarusi

«Siurpryzaŭ nie zdaryłasia. Mikoła Statkievič u PK 13 u Hłybokim», — napisała Adamovič.

Niadaŭna Viarchoŭny sud pastanaviŭ pakinuć prysudy fihurantam «spravy Cichanoŭskaha» bieź źmienaŭ. Statkieviču sud pryznačyŭ 14 hadoŭ kałonii va ŭmovach asablivaha režymu.

Toje, što Statkieviča adpravili mienavita ŭ hetu kałoniju — pomsta Łukašenki za jahonyja kolišnija «hrachi». U Mikałaja Statkieviča, jakoha ŭtrymlivajuć za kratami ŭžo 24 miesiacy, jość niepahašanaja sudzimaść pa art. 293 Kryminalnaha kodeksa. Tamu, zhodna z zakanadaŭstvam, Mikałaju navat nie mohuć pieraličyć dni, praviedzienyja ŭ SIZA (pa novych praviłach adzin dzień utrymańnia pad vartaj adpaviadaje paŭtara dniam pazbaŭleńnia voli z adbyvańniem u papraŭčaj kałonii va ŭmovach ahulnaha i ŭzmocnienaha režymu).

Asablivy režym praduhledžvaje: štomiesiačnuju «atavarku» na 3 bazavyja vieličyni; dva karotkaterminovych i adno praciahłaje spatkańnie na praciahu hoda; adnu pasyłku abo pieradaču i dźvie banderoli ci dva drobnyja pakiety na praciahu hoda.

U niadaŭniaj razmovie z «Novym časam» Maryna Adamovič raspaviała, što ŭ Hłybockaj kałonii viaźniaŭ utrymlivajuć u kamierach zamiest atradaŭ:

«Adzinaje, u čym ja padmanułasia, što prapuściła — heta toje, što asablivy režym praduhledžvaje kamiernaje ŭtrymańnie. Heta takaja zavualavanaja forma turmy pad vyhladam kałonii.

Pa sutnaści, asablivy režym — heta ŭzakonienaje marudnaje zabojstva. Zvyčajna ludzi nie vyžyvajuć tam na praciahu takich terminaŭ. Kali ja pračytała pra heta, prosta raspaŭzłasia łužynaj u tym homielskim hatelčyku.

Mikałaja čakaje asablivy režym utrymańnia ŭ Hłybokim, kudy jaho pavinny pieravieści na praciahu dziesiaci dzion paśla taho, jak projdzie apielacyja.

Kałonija vielmi padobnaja da armii. Adzinaje što — za kalučy drot nie vyjdzieš. Tam praduhledžanaje kazarmiennaje ŭtrymańnie, tam jość atrady, spartyŭnyja placoŭki…

Asablivy režym — zusim inšaje. U Hłybokim vielmi śpiecyfičny kantynhient. Tam utrymlivajucca sapraŭdnyja asabliva niebiaśpiečnyja recedyvisty — zabojcy, hvałtaŭniki, asoby, asudžanyja da pažyćciovaha źniavoleńnia, i tyja, kamu śmiarotnaje pakarańnie zamienienaje na pažyćciovaje. Siarod takich ludziej budzie moj Mikałaj.

Psichałahična heta mocna mianie ŭraziła.

Ale ja viedaju, nakolki mocny Mikałaj čałaviek, jak i viedaju toje, što ŭ ich stolki času dakładna niama».

• 4
• 0
• 1
• 1
• 0
• 4
• 30
• 0