Biełaruskija turfirmy dahetul prapanujuć pajezdki ŭ Krym. Kolki biaruć?
Biełaruskija turapieratary, što pradajuć tury ŭ Krym, navat nie prapanujuć rabić strachoŭki, choć ciapier na poŭdni Ukrainy iduć bajavyja dziejańni. A ceny — blizkija da tureckich kurortaŭ.
Paśla aneksii paŭvostrava Rasijaj mnohija vyrašyli admovicca ad adpačynku tam pa palityčnych matyvach.
Inšyja navažvalisia jeździć u Krym praz Rasiju, ale taki šlach nie mieŭ vialikaj papularnaści, bo adlehłaść ad Minska da Jałty praz Ukrainu składała mienš za 1500 km, a kali jechać praz Rasiju — to 2300 km. I što važna — naviedvańnie Kryma praz RF mahło pryvieści da niehatyŭnych nastupstvaŭ, kali paśla hetaha čałaviek źbiraŭsia ŭ inšuju častku Ukrainy.
Tym nie mienš, niekatoryja biełaruskija turapieratary praciahvajuć pradavać tury ŭ Krym. Zaŭvažna, što nivodny ź ich nie nastojvaje i navat nie prapanoŭvaje rabić strachoŭki, choć ciapier na poŭdni Ukrainy iduć bajavyja dziejańni.
I nie papiaredžvajuć, što naviedvańnie Kryma praz terytoryju RF — heta parušeńnie ŭkrainskaha zakanadaŭstva, jakoje ciahnie zabaronu na ŭjezd va Ukrainu.
Adzinaja prablema, jakuju adznačajuć u firmach, — prablemy z kartkami.
«Kali vy źbirajeciesia jechać na adpačynak u Krym, to treba zapaścisia najaŭnymi, pažadana adrazu ŭ rasijskaj valucie. Z raźlikam kartkami tam jość peŭnyja składanaści. Bolšaść biełaruskich bankaŭskich kartak u Krymie nie pracuje. U małych kramach i kaviarniach prymajuć tolki hatoŭku», — pačuli my ad turahientaŭ.
34—36 hadzin u darozie
Što prapanujuć? Pieravažna aŭtobusnyja tury z vyjezdam ź Minska, Babrujska, Žłobina i Homiela.
«Daroha ź Minska da mora na turystyčnym aŭtobusie zajmaje 34—36 hadzin. Aŭtobus vyjazdžaje ź Minska ŭviečary, tamu nočyć u darozie daviadziecca dvojčy. Aŭtobus nie spyniajecca na načleh, na ŭsim šlachu (bolš za 2000 km) praduhledžany tolki sanitarnyja prypynki raz na 4—5 hadzin»,
— apisvajuć šlach da Kryma ŭ adnoj sa staličnych turfirm.
Cana adpačynku mocna zaležyć nie tolki ad miesiaca i ŭzroŭniu hatela, ale i ad nasielenaha punkta.
Na kaniec červienia — pačatak lipienia ahučvajuć nastupnyja prapanovy:
«Jość varyjanty 10-dzionnaha adpačynku ŭ Sudaku pa 285 $ za darosłaha i 225 $ za dzicia da 12 hod. Da hetaj sumy treba dadać pa 65 rubloŭ z darosłaha i 55 ź dzicia za turpasłuhu. Heta pačatkovyja ceny na pucioŭku biez charčavańnia. U pakiet uvachodzić tranśfier i pražyvańnie».
Turahienty dadajuć, što na siamju z troch čałaviek štodzionna na charčavańnie daviadziecca tracić jašče kala 50 dalaraŭ.
Kali heta varyjant z trochrazovym charčavańniem, to cana 10-dzionnaj pucioŭki na adnaho darosłaha ŭzrastaje da 630 dalaraŭ.
Ź siaredziny lipienia ceny jašče vyšejšyja. Pry hetym turahienty adznačajuć, što heta ŭsio adno startavyja ceny.
«Krymski all inclusive»
Bolšaść biełaruskich turapierataraŭ, jaki voziać u Krym, prapanujuć tury na ŭschodnim uźbiarežy — u Fieadosiju, Sudak, Kaktebiel.
«Paŭdniovy bierah daražejšy za ŭschodni, u dadatak heta na 200—300 kiłamietraŭ bolš darohi, čym da taho ž Sudaka, tamu my navat nie prapanujem adpačynak na paŭdniovym bierazie Kryma», — adznačyli ŭ adnoj z turfirmaŭ.
Turahiencyj, hatovych vieźci biełarusaŭ dalej za Sudak, nie šmat, ale jany jeść. U adnoj ź ich navat prapanoŭvajuć «krymski all inclusive».
«Zaraz jeść vielmi vyhadnaja prapanova ŭ Ałušcie pa prahramie all inclusive. Pry vyjeździe ź Minska 28 červienia cana 10-dziennaj pucioŭki składzie kala 1500 dalaraŭ za dvaich darosłych. Heta davoli redkaja prapanova dla Kryma», — rekłamujuć u adnoj ź firmaŭ.
Tranśfier (biez adpačynku) da Krymskaha paŭvostrava pradajuć pa nastupnych cenach. Prajezd pa maršrucie Minsk—Fieadosija (Sudak) — 130—140 $ z čałavieka, da Jałty ci Ałušty — 150—160 $. Plus 60—70 rubloŭ za turpasłuhu.
«Doraha? Nu možam jašče Abchaziju prapanavać», — parekamiendavali na tym kancy provada.
Čytajcie taksama:
«Hrodna dla Biełarusi — heta jak Lvoŭ dla Ukrainy». Što z turystami ŭ Hrodnie paśla adkryćcia miežaŭ
-
«Nad hałavoj lataje pa 20 ton». Brat i siastra ź Biełarusi raskazali, kolki zarablajuć u porcie polskaj Hdyni
-
«Mnohija ludzi stanuć niepatrebnymi». Suzasnavalnik EPAM pra siabroŭstva z Dobkinym, bahaćcie i niaroŭnaść, žyćcio ŭ Łatvii i nastalhiju
-
U lipieni Rasija jašče bolš pavialičyła zakupki paliva ŭ Biełarusi
Ciapier čytajuć
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu12
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary