Ukraina budzie damahacca pryznańnia Biełarusi razam z Rasijaj krainaj — sponsaram teraryzmu
Ukraina choča, kab mižnarodnaja supolnaść pryznała Biełaruś krainaj — sponsaram teraryzmu, paviedamlaje Ofis prezidenta Ukrainy.
Hrupa ŭkrainskich i mižnarodnych ekśpiertaŭ 20 krasavika pradstaviła płan rekamiendacyj dla mižnarodnaj demakratyčnaj supolnaści pa kompleksie dalejšych ekanamičnych mier, skiravanych na prymus rasijskaha kiraŭnictva da chutčejšaha spynieńnia vajny va Ukrainie i maksimalnaje pavieličeńnie koštu ahresii dla Rasiei.
Adnym z klučavych kirunkaŭ sankcyjnaj palityki nazyvajecca pryznańnie Rasii i Biełarusi dziaržavami — sponsarami teraryzmu, a Uzbrojenych siłaŭ RF — terarystyčnaj arhanizacyjaj.
Akramia taho, u płanie zhadvajecca poŭnaja zabarona na rasijski ekspart enierhanośbitaŭ, pašyreńnie sankcyj suprać finansavych siektaraŭ Rasii i Biełarusi, uzmacnieńnie transpartnych i strachavych sankcyj, pašyreńnie handlovych embarha i piersanalnych sankcyj.
Taksama ŭ płanie adznačajecca važnaść uviadzieńnia druhasnych sankcyj i sinchranizacyi namahańniaŭ demakratyčnych krain u sankcyjnaj palitycy.
Źjaŭleńnie Rasii i Biełarusi ŭ śpisie dziaržaŭ — sponsaraŭ teraryzmu aznačała b uviadzieńnie sankcyj suprać luboj krainy, jakaja budzie praciahvać vieści ź imi narmalnaje ekanamičnaje supracoŭnictva.
Kamientary