U Minsku znoŭ zatrymali žančynu, jakaja paśla adbyćcia sutak pryjšła ŭ milicyju pa telefon
52-hadovaja Śviatłana Hacko adsiadzieła ahułam bolš za 100 sutak. Apošni raz jana praviała 25 sutak u turmie №4 Mahilova. Siońnia, 14 krasavika, jana pajšła zabirać svoj telefon u RUUS Zavodskaha rajona stalicy, ale adtul tak i nie vyjšła. Blizkija Śviatłany patelefanavali ŭ adździaleńnie i tam im adkazali, što žančyna nibyta pryjšła ŭ RUUS i «paprasiła, kab jaje zabrali na Akreścina». Krychu paźniej adbyŭsia sud — Śviatłanie vypisali 15 sutak, piša Zerkalo.io.
Śviatłanie Hacko 52 hady. Ź ich 33 žančyna adpracavała na čyhunačnaj stancyi «Šabany». Kaža, da 9 žniŭnia nie cikaviłasia palitykaj, ale padziei, jakija adbylisia paśla prezidenckich vybaraŭ, źmianili jaje žyćcio.
Pieršy raz jaje zatrymali 8 listapada 2020 hoda padčas niadzielnaha maršu ŭ Minsku. U svaim intervju dla prajekta «Žnivień 2020» žančyna raspaviadała, što ŭ toj dzień jana prosta chacieła sustrecca ŭ centry horada z synam. Ale jaje ŭsio roŭna pryznali vinavataj i dali 10 sutak. Pakarańnie jana adbyvała ŭ Žodzinie. Padčas svajho aryštu jana ciažka pierachvareła na kavid.
Paźniej byli i inšyja zatrymańni, u mai i lipieni 2021 hoda. Adzin raz zabrali z padjezda jaje doma razam z maleńkim unukam. Druhi raz u siłavikoŭ byli pretenzii z nahody dopisu Śviatłany u sacsietkach, kali jana vinšavała Maryju Kaleśnikavu.
Apošni raz Śviatłana atrymała 25 dzion na pačatku sakavika. Pavodle infarmacyi pravaabaroncaŭ, žančynu zabrali razam z aktyvistkaj Halinaj Łahackaj — jany raźviešvali ŭlotki «Nie vajnie».
Svajaki ž kažuć: u pratakole było paznačana, što žančyny nibyta pryjšli da prachadnoj MAZa pozna ŭviečary i zładzili mitynh, kryčali za płot rabočym «Žyvie Biełaruś».
— Viadoma, heta niapraŭda, — tłumačyć svajačka minčanki. — Naohuł, u jaje doŭhaja historyja aryštaŭ. U ahulnaj składanaści jana adsiadzieła ŭžo amal 100 sutak.
Z apošnich sutak Śviatłana vyjšła 31 sakavika. Ale na voli praviała tolki dva tydni. Siońnia jana adpraviłasia ŭ Zavodskaje RUUS pa telefon, jaki ŭ jaje zabrali, i adtul užo nie vyjšła.
— Jana apłaciła svaje 25 sutak (vydatki na ŭtrymańnie) i pajšła ŭ RUUS, — kaža svajačka. — Adtul užo nie vyjšła. Ja patelefanavała ŭ milicyju, a tam adkazali, što Śviatłana nibyta sama paprasiła, kab jaje zabrali ŭ IČU na Akreścina.
Viadoma, što žančyna atrymała jašče 15 sutak. Za što kankretna, infarmacyi niama.
Z-za šmatlikich «administratyvak» Śviatłanu zvolnili z čyhunki. Jana pracavała pryjomasdatčykam hruzu i bahažu.
— Amal 8 miesiacaŭ sudziłasia, kab jaje adnavili, — kaža svajačka Śviatłany. — Aryšty paličyli prahułami, choć ukaz ab hetym vyjšaŭ paźniej. Tam usie pakazańni byli padroblenyja. Dajšła da Viarchoŭnaha suda, ale ŭsio biezvynikova. Voś užo hod jana šukaje pracu, ale jaje nikudy nie biaruć.
«Achoŭniki bačyli, jak ja trasusia ad choładu, i śmiajalisia». Žančyna, jakaja adbyła sutki ŭ Mahilovie, raskazała pra ŭmovy tam
Ciapier čytajuć
Byłoha vajskoŭca z Bresta, jaki viarnuŭsia z Polščy, abvinavacili ŭ «teraryźmie» i adpravili ŭ kałoniju4
Kamientary