«Adzin syn u śpiecnazie słužyć, druhi — na tanku. Jon bajaŭsia, što ich pašluć vajavać». Što viadoma pra zatrymanych za «padrychtoŭku terakta»

U roliku BT fihurujuć dvoje: 34-hadovy Siarhiej Plaškun i 44-hadovy Juryj Sielvič. 

Pavialičyć

Abodva žyli ŭ Mazyry. U Pleškuna dvoje małych dziaciej, u Sielviča dvoje ŭžo darosłych chłopcaŭ i niepaŭnaletniaja dziaŭčynka, jakuju ŭziali ź dziciačaha doma.

«Naša Niva» źviazałasia ź blizkimi znajomymi siamji Juryja Sielviča. 

«Juryj pracavaŭ na siabie, žonka pracuje ŭ dziciačym sadku. U 2020 hodzie Juryj udzielničaŭ u pratestach, jaho zatrymlivali, paśla troch sutak aštrafavali», — raskazvaje surazmoŭca «Našaj Nivy».

Jon kaža, što Sielviča zatrymali jašče 28 lutaha. Papiarednie, zatrymlivaŭ KDB. 

«Ja nie zmoh datelefanavacca da jaho, paśla akazałasia, što jon zatrymany. Da jaho pryjšli ź pieratrusam, prychodzili taksama da jaho siastry — u jaje dvary staić Jurava mašyna.

U domie Jury, akramia staroha pnieŭmatyčnaha pistaleta, ničoha nie znajšli, u mašynie taksama. Taksama na Juru byŭ aformleny niejki haraž, im zajmałasia jaho ciešča. Tam taksama byŭ pieratrus — nakolki viedaju, ničoha nie znajšli. Ja tak razumieju, heta nie toj haraž, jaki pakazali pa televizary».

Vynikaje, što sačyli za mužčynami pilna: u siužecie BT pakazvajuć kadry sa schavanaj kamiery ŭ haražy, dzie mužčyny abmiarkoŭvajuć svaje płany. Na zapisie jany havorać pra pierśpiektyvu paškodžańnia relsaŭ.

Jak i čamu siłaviki zacikavilisia mienavita Plaškunom i Sielvičam, pakul dakładna nie viadoma. Mahčyma, šturškom stała videa, jakoje Sielvič skinuŭ u kanał «Niechta». Na videa Sielvič źniaŭ kałonu rasijskaj vajskovaj techniki, tam hučyć i jaho hołas. U tym haražy Sielvič pryznajecca Pleškunu: jaho pa hołasie paznała navat siastra z Tatarstana, jakaja ŭbačyła rolik u telehram-kanałach.

U jakaści dokazaŭ pa BT pakazali «rečyvy, jakija mohuć vykarystoŭvacca pry vytvorčaści vybuchovych rečyvaŭ», pustyja butelki, bałončyki z čyrvonaj i biełaj farbaj, pnieŭmatyčny pistalet. Zhadali pra fłeški ź infarmacyjaj pra vybuchoŭki.

U mašynie Pleškuna znajšli pietardy, makiet hranaty, dźvie bity i bieła-čyrvona-bieły branzalet.

Vyhladaje, što hałoŭnym dokazam budzie zapis sa schavanaj kamiery ŭ haražy. Na im mužčyny taksama abmiarkoŭvajuć, što treba «narabić kaktejlej Mołatava», «kidać ich z mosta ŭ kałonu». Taksama adzin ź ich kaža, što «šukaŭ učora sałdat, kab *** [pabić ich] i zabrać zbroju», raskazvaje, što źviazvaŭsia z «Bajpołam».

Druhim dokazam stanuć pakazańni Pleškuna. Jaho pakazvajuć u roliku BT, kažuć, što jon supracoŭničaje sa śledstvam i daje pryznalnyja pakazańni. Sielvič ža kateharyčna admaŭlajecca supracoŭničać sa śledčymi i nie pryznaje vinu. 

«Juryj nie padtrymlivaŭ hetuju vajnu. 

U jaho ž dvoje chłopcaŭ prosta ciapier słužać u vojsku. Starejšy syn — u śpiecnazie, małodšy — niedzie na tanku jeździć ci niešta takoje. Praz heta jon vielmi panikavaŭ, bajaŭsia, što ich na vajnu mohuć adpravić,

— raskazaje znajomy Sielviča. — Juryj vielmi pieražyvaŭ za dziaciej — jak i ŭsie ciapier. Adzin ź jaho synoŭ słužyć u Marjinaj Horcy, ciapier jon na vučeńniach.

Kali z 8 sakavika sałdaty z Marjinaj Horki nie vychodzili na kantakt, to tudy prosta pajechali ich maci, pytacca, dzie ich dzieci. Nakolki ja viedaju, žančynam sałdat nie pakazali, rastłumačyli, što tyja ŭ lesie, na vučeńniach, ale paabiacali što ŭ hetuju niadzielu (20 sakavika) usie viernucca. 

Syn Juryja raskazvaŭ, pra što im kažuć u vojsku. Jašče ŭvosień im raskazvali, što Polšča chacieła b napaści, što vakoł vorahi. A ciapier pałochajuć napadam Ukrainy.

Juryj vielmi chvalavaŭsia za dziaciej. Ale nikoli nie kazaŭ, što płanuje niešta pradprymać. Jaho zatrymańnie — šok. Miarkuju, jaho słovy — prosta na emocyjach, na sapraŭdnyja dziejańni jon by nie pajšoŭ. A pa televizary ŭsio nakrucili, što jany terarysty».

Ciapier Plaškuna i Sielviča vinavaciać u padrychtoŭcy akta teraryzmu. Im pahražaje da 20 hadoŭ kałonii.

• 0
• 0
• 2
• 0
• 0
• 0
• 0
• 0