U Armienii pratestujuć suprać słovaŭ Łukašenki druhi dzień. Prajšła jašče i akcyja pratestu kala biełaruskaj ambasady
9 lutaha akcyju pratestu pierad biełaruskaj ambasadaj u Jerevanie zładziła partyja Nacyjanalna-demakratyčny polus, jakaja staić na antyrasijskich i prazachodnich pazicyjach. Taksama suprać słovaŭ Łukašenki vykazalisia niekatoryja deputaty parłamienta, piša Biełsat.
«Dyktatar Biełarusi pradaŭ krainu i svaju asobu Rasii, kab krychu padoŭžyć ułasnaje kiravańnie, i staŭ pres-sakratarom Pucina. Nahadajem, prezident Biełarusi Łukašenka nazvaŭ Armieniju nikomu nie patrebnaj (čytaj: nikčemnaj) krainaj», — havorycca ŭ paviedamleńni prychilnikaŭ arhanizacyi.
Raskrytykavali Łukašenku i deputaty roznych frakcyj armianskaha parłamienta.
Tak, pradstaŭnik kiroŭnaj frakcyi «Hramadzianskaja damova» Vaharšak Akapjan zajaviŭ, što «padobnyja słovy nieprymalnyja i niedarečnyja dla prezidenta krainy, a takija farmuloŭki zahannyja».
«Kiraŭnik našaj krainy-partniora nie maje prava vykazvać padobnyja dumki ŭ dačynieńni inšaj krainy-partniora. Žadaju nahadać, kamu patrebnaja była Armienija padčas apošnich padziejaŭ u Kazachstanie. Ja ŭpeŭnieny, što spadar Łukašenka lepš za ŭsich viedaje, kamu patrebnaja Armienija», — skazaŭ jon.
Jahony kaleha Avik Ahazarjan zajaviŭ, što «takija ludzi, jak Łukašenka i Marharyta Simańjan, svajoj dziejnaściu akazvajuć miadźviedžuju pasłuhu rasiejskamu ŭradu i rasijskaj dziaržavie. Pierš čym rabić takija zajavy, lepš by Łukašenka pahladzieŭ, što robicca ŭ minskim aeraporcie, jaki bolš padobny da śvinarnika».
A inšy deputat Rustam Bakajan skazaŭ:
«A kamu patrebny Łukašenka? Hetaje rytaryčnaje pytańnie, dumaju, biełaruski narod jamu zadaŭ, i tyja pracesy, jakija adbylisia ŭ krainie, byli dakładnaj acenkaj jahonaha minułaha terminu kiravańnia, taho, u jakim stanie jon utrymlivaŭ krainu, i jakim staŭ vynik».
U svaju čarhu v. a. śpikiera parłamienta Armienii Akop Aršakjan zajaviŭ, što kraina nie abmiarkoŭvaje dałučeńnia da «Sajuznaj dziaržavy».
Kanflikt uźnik z-za taho, što ŭ niadaŭnim intervju rasijskamu prapahandystu Uładzimiru Sałaŭjovu Łukašenka skazaŭ: «Armienii dziavacca niama kudy. Vy kažacie, kamuści patrebnyja? Jany ŭžo ŭbačyli. Azierbajdžan vybivajecca z hetaj kahorty, my tam šmat pamyłak narabili. Heta asobnaja razmova. I tam, prosta, Turcyja vielmi mocna padtrymlivaje Azierbajdžan. Praz Turcyju iduć šlachi, haz, nafta…»
Paśla hetaha MZS Armienii zajaviła, što svojeasablivaje mierkavańnie Łukašenki nie maje ničoha supolnaha z Armienijaj i jaje zamiežnaj palitykaj i «pryznačana vyklučna dla ŭnutrypalityčnaha paradku dnia». A pasoł Biełarusi ŭ Armienii Alaksandr Kaniuk vyklikaŭsia ŭ MZS na razmovu.
Kamientary