Čyhunačnik pra ŭzłom sistemy na Biełaruskaj čyhuncy: «Rabočyja radyja, što ŭsio tak adbyvajecca»
Pradstaŭnik «Rabočaha ruchu» na čyhuncy Siarhiej Vajciachovič raskazaŭ Radyjo Svaboda pra nastupstvy ataki «Kibierpartyzanaŭ» na Biełaruskuju čyhunku i patłumačyŭ, čamu čyhunačniki śmiajucca sa słovaŭ Łukašenki pra toje, što Biełaruś nie ŭ stanie pryniać 200 vajskovych sastavaŭ z Rasii.
«Kibierpartyzany» śćviardžajuć, što ŭzłom elektronnaj sistemy Biełaruskaj čyhunki adbyvaŭsia ad viečara ŭ niadzielu da ranicy ŭ paniadziełak. Jon rabiŭsia z metaju zapavolić ruch rasijskich vajskovych ciahnikoŭ na anansavanyja ŭ Biełarusi vučeńni. Sama čyhunka nie kamientavała hetaha zdareńnia, ale pryznała prablemy z anłajn-prodažam kvitkoŭ. Pavodle «Kibierpartyzanaŭ», ich ataka naniesła surjoznyja straty Biełaruskaj čyhuncy, asabliva hruzavym pieravozkam.
Hetuju infarmacyju paćviardžaje i Siarhiej Vajciachovič. Jon kaža, što paškodžańni nastolki surjoznyja, što vialikaja častka pracy robicca ciapier na čyhuncy ŭručnuju.
Vajciachovič pracavaŭ na Biełaruskaj čyhuncy 4 hady. Jon byŭ rabočym u Minskim vahonnym depo, u adździele ekspłuatacyi. U krasaviku 2021 hodu jaho zvolnili pa palityčnych matyvach.
Na što paŭpłyvała ataka «Kibierpartyzanaŭ»
«Usio lažyć. Nakryłasia ARM — aŭtamatyzavanaje rabočaje miesca. I jašče taki vyraz, jak AS — aŭtamatyzavanaja sistema, u jakoj niepasredna pracujuć rabočyja, jakija afarmlajuć pryvozačnuju dakumentacyju, źviazanuju z rucham ciahnikoŭ. Toj ža AS ODHP (Aŭtamatyzavanaja sistema pryviazki składaŭtvareńnia da hrafika ruchu ciahnikoŭ) — heta sistema, jakaja aŭtamatyčna pryviazvaje hrafik składaŭtvareńnia. Heta surjoznaja sistema, i jana taksama nie pracuje. Usio robicca ŭručnuju. A jość «Elektronnyja pieravozki». Heta sistema, praź jakuju idzie ŭvieś dakumienta-elektronny abarot. Naprykład, tavarnyja nakładnyja, pieravozačnyja dakumienty, hruzavyja paviedamleńni, rachunki za apłatu na pieravozki. A ciapier prablemy, bo vahony prastojvajuć.
Heta mocny ŭdar pa reputacyi čyhunki ŭ pytańniach biaśpieki. I pierad RŽD (Rasijskaj čyhunkaj) taksama, i čyhunkami inšych krain, bo idzie zatrymka hruzaŭ praz toje, što nie mohuć aformić pieravozačnuju dakumientacyju.
Nakolki surjozny zboj u anłajn-prodažy kvitkoŭ
«Prablema z prodažam kvitkoŭ — heta drobiaź. Jość jašče takaja sistema, jak SAP: sistema kiravańnia biznes-prajektami. Adzin ź jaje modulaŭ taksama paškodzili, i ŭ vyniku na čyhuncy nie zmahli naličyć zarobki. U paniadziełak jany ŭžo viedali, što nie paśpiejuć chutka ŭsio vypravić, i ličyli ŭsio ŭručnuju. Archivy ŭsie źniščanyja. Hladzieć niejkuju statystyku za minuły hod ci miesiac niemahčyma, u elektronnym vyhladzie ničoha nie zastałosia. Adnavić heta možna pa častkach, źbirajučy dadzienyja z padatkovaj, z «Biełarusbanka» i inšych struktur».
Jak uzłom uvohule staŭ mahčymy na takim stratehičnym abjekcie
«Bo tałkovych śpiecyjalistaŭ u IT-adździele amal nie zastałosia. Dy navat AAC u aktach piša roznuju achinieju. Za apošnija paŭhoda heta ŭžo treciaje niesankcyjanavanaje atrymańnie dostupu da karparatyŭnaj sietki Biełaruskaj čyhunki.
Siłaviki chadzili ŭ aŭtorak pa IRC, pa ŭpraŭleńni čyhunki. Nie viedaju, kaho jany chacieli tam znajści. Praviarali tam kampjutary, bo dumajuć, što niechta dapamahaŭ znutry. KDB biaskonca tam łazić, za kimści špijonić jašče ź vieraśnia, kali adbyłosia pieršaje praniknieńnie ŭ karparatyŭnuju sietku».
Čamu jany nie ŭ stanie chutka vypravić prablemu
«Voś heta hałoŭnaje. Z hetym nie mohuć ničoha zrabić. Śpiecyjalista, jaki raźbiraŭsia ŭ hetym typie bazy dadzienych, zvolnili za palityku jašče letaś. Niuans u tym, što technałohija staraja i maładyja śpiecyjalisty ŭ joj nie raźbirajucca». Chutčej za ŭsio, znojduć kahości na aŭtsorsynhu, jaki adnović pracazdolnaść bazy dadzienych. Ale sami dadzienyja ŭžo nie adnoviać, bo nakryli bazy i reziervovyja kopii na stužkavych nazapašvalnikach taksama. Paprybirali i zašyfravali.
«Kibierpartyzany» śćviardžajuć, što, uzłamaŭšy sistemu, mahli całkam spynić ruch. Ci praŭda heta
«»Kibierpartyzanam» nie treba nijakich tysiač achviaraŭ, krušeńniaŭ i h. d. Jość takaja sistema dyśpietčarskaj centralizacyi «Nioman». Jana kiruje strełkami i śvietłaforami na ŭsioj čyhuncy. I kali ty chakier, atrymlivaješ dostup da karparatyŭnaj sietki. I kali ty znachodziš spasyłku na siervier samoha «Niomana», atrymlivaješ nad joju kantrol, to ty možaš luby ciahnik puścić pad adkos, možna stvaryć sutyknieńnie. Kali b realnyja terarysty atrymali dostup da hetaj prahramy, to byli b achviary».
Što pra ataku dumajuć sami čyhunačniki
«Rabočyja radyja, što ŭsio tak adbyvajecca. Jany złyja i pakryŭdžanyja na kiraŭnictva, bo zvalniajuć ludziej, viešajuć na ich dadatkovuju pracu, z boku kiraŭnictva staŭleńnie ŭvohule skockaje. Bolšaść havoryć, što tak i treba. Navat uličvajučy toje, što heta ŭpłyvaje na prybytki.
U kiraŭnika čyhunki Uładzimira Marozava ŭ paniadziełak byŭ pieršy dzień paśla adpačynku. Kiraŭnictva ŭ panicy, nie viedajuć, što rabić».
Ci skončylisia na čyhuncy palityčnyja represii
«Letaś byli śpisy na zvalnieńnie 1000 čałaviek. 23-24 listapada było pasiedžańnie ŭ Maskvie siabroŭ ADKB nakont techničnaha prykryćcia čyhunki. I tam stavili adno z pytańniaŭ — začyścić ekspłuatacyju BČ dla harantyi biaśpieki prachodu ešałonaŭ. Kab nie vyciakała infarmacyja. Bo na vučeńniach «Zachad-2021» pa ich vyciekła ŭsio. I hrafiki ruchu ciahnikoŭ, i jak rychtavalisia da hetych vučeńniaŭ: usio, što datyčyła struktury BČ. Tamu jany vyrašyli pierastrachavacca, pačali zvalnieńni, ale zrazumieli, što prosta nie budzie kamu pracavać».
Ci maje racyju Łukašenka, što pryniać 200 vajskovych sastavaŭ z Rasiei niemahčyma
«My paśmiajalisia z kalehami z BČ nakont hetaha. Za adzin dzień Biełaruskaja čyhunka tolki pa adnym styku pryniała 17 ciahnikoŭ z Rasii. Tolki pa adnym styku, za adzin dzień. Heta achinieja, što jon tam nios, što nielha pryniać 200 ešałonaŭ. Heta zvyčajnaje admaŭleńnie, jak i toje, što jany admaŭlajucca pryznać, što partyzany ŭzłamali Biełaruskuju čyhunku. Raniej jany nazyvali heta teraryzmam abo špijanažam, a ciapier prosta admaŭlajuć.
33 vajskovyja ešałony zajechali z 16 da 21 studzienia. Dla paraŭnańnia, kali byli vučeńni «Zachad-2021», za miesiac pryjechała tolki 29 ešałonaŭ. Jany bajacca dyviersij, tamu pastajanna zrušvajuć hrafiki. Da 10-ha lutaha płanujecca 200 vajskovych ešałonaŭ. Za miesiac heta ŭvohule nie ličba, lohka prymajecca».
Čytajcie taksama:
BČ častkova adnaviła pracu servisu anłajn-kupli kvitkoŭ na ciahniki
«Śpiecyfičnyja bazy danych, nie chapaje śpiecyjalistaŭ adnavić». Što adbyvajecca na čyhuncy paśla ŭzłomu? Padrabiaznaści
«Prablemy pačalisia z troch hadzin nočy». Što jašče viadoma pra zboj u pracy čyhunki?
Ciapier čytajuć
Piśmieńnica Taćciana Zamiroŭskaja raskazała pra novuju knihu, sny pra Łukašenku, košt žyćcia ŭ Ńju-Jorku i toje, čamu złujecca na niekatorych biełarusaŭ3
Kamientary