«Čamu b nie ŭnieści źmieny, što prezidentam moža być tolki łysieńki i vusaty?» U Vysokim inžyniera zatrymali paśla «abmierkavańnia Kanstytucyi»
Čarhovy schod pa «abmierkavańni Kanstytucyi» skončyŭsia zatrymańniem. Zdaryłasia heta ŭ haradku Vysokaje Kamianieckaha rajona. Nahodaj stała ŭsiaho adna fraza, kinutaja ŭ razmovie inžynieram-łabarantam. «Naša Niva» daviedałasia padrabiaznaści hetaj historyi.
Schod nakont papravak u Kanstytucyju prachodziŭ 19 studzienia ŭ darožna-budaŭničym upraŭleńni horada. Pryjechała delehacyja na čale sa staršynioj Kamianieckaha rajvykankama Vitalom Kułakom.
Na sustrečy Vital Kułak raskazaŭ, jak paśpiachova ŭ nas zmahajucca z karanavirusam, što na heta patracili 50% biudžetu rajona. Zhadaŭ, što ŭ krainie biaspłatnaja miedycyna. 41-hadovy inžynier-łabarant pradpryjemstva Andrej Dubina jaho papraviŭ: maŭlaŭ, miedycyna nie biespłatnaja, bo finansujecca ź biudžetu, asnoŭnuju častku jakoha farmirujuć našy padatki.
Paśla staršynia rajona začytaŭ z papierki papraŭki, jakija prapanujucca ŭ Kanstytucyju. Siarod ich — pra toje, što prezidentam moža być tolki čałaviek starejšy za 40 hadoŭ, jaki nie mieŭ dazvołu na žycharstva ŭ inšych krainach za apošnija hady.
«Ci jość pytańni?» — spytaŭ Kułak i pahladzieŭ na inžyniera.
Toj i vypaliŭ: «A čamu b nie ŭnieści źmieny, što prezidentam moža być tolki toj, chto dasiahnuŭ 65-hadovaha ŭzrostu, łysieńki i vusaty?»
Kułak aburyŭsia niečakanaj zaŭvahaj. Ale potym chtości spytaŭ pra biaspłatnuju miedycynu i pieraklučyŭ uvahu.
Paśla schodu pryjechała milicyja i zabrała inžyniera Dubinu. Spačatku jaho pavieźli ŭ palikliniku na miedahlad (mužčyna byŭ ćviarozy), paśla ŭ aporny punkt. Unočy paśla apytańnia mužčynu adpuścili.
Čytajcie taksama:
«Navošta nam UNS? Jany tam prosta śpiać». Jak baranavickija pradprymalniki abmiarkoŭvali Kanstytucyju
Łukašenka pra pryniaćcie novaj Kanstytucyi: Kali ŭžo ščyra, to mnie hety praces absalutna nie patrebny
«Jak u Amierycy nam nie treba». Što kažuć padčas «usienarodnaha» abmierkavańnia Kanstytucyi ŭ rehijonach
Ciapier čytajuć
«Ja bolš nie anarchist». Mikoła Dziadok — pra turmu, Boha i rasčaravańnie ŭ ideałohijach28
Kamientary